ने. सं. ११४४ कौलाथ्व पारू - नःलास्वनेगु

स्वनिगः दुहांवयेगु फुक्क नाकाय् सील याइगु, अत्यावश्यक प्रयोजनया निंतिं जक वयेबीगु

येँ – लकडाउनया इलय् स्वनिगः वइपिं अप्वया वनेवं थन दुहांवयेगु फुक्क नाकाय् अत्यावश्यक प्रयोजनयात बाहेक पूर्णरुपं सील याइगु जूगु दु ।

गृह मन्त्रालयं स्वनिगः दुनेया फुक्क स्थानीय तहयात छगू निर्देशन जारी यासें अत्यावश्यक ज्यायात बाहेक स्वनिगःलय् प्रवेश निषेध यायेत धाःगु दु । गृह मन्त्री रामबहादुर थापाया अध्यक्षताय् येँ महानगरपालिकाया मयेर विद्यासुन्दर शाक्य, यल महानगरया मयेर चिरिबाबु महर्जन नापं गृहसचिव, स्वनिगःया सुरक्षा प्रमुखत नापं नगरपालिकाया प्रमुखत नाप च्वंगु मुँज्यां याःगु थज्याःगु निर्णय याःगु खः ।

मन्त्रालयं स्वनिगः वइगु छुं नं गाडीयात आगमन श्रोतय् हे पनेत प्रस्थान जिल्लाया सुरक्षा निकाययात विशेष निगरानी यायेत व आवगमनय् कडाई यायेत निर्देशन बिउगु दु । यदि सुं नं मनू स्वनिगः दुने अत्यावश्यक ज्याया निंतिं वयेमाःसा उम्ह मनूखं आरडीटी परीक्षण याःगु रिपोर्ट क्यनाः जक अनुमतिया निंतिं माग यायेफइगु खँ धाःगु दु । नापं स्वनिगःया प्रवेश नाकाय् चेकजाँच व निगरानीइ थप कडाई यायेत धाःगु दु ।

अथेहे सुला सुला स्वनिगः दुहांवयाच्वंपिंत पूर्णरुपं पनेगु व उकीया निंतिं स्वनिगः दुनेया स्थानीय तहं स्थानीय प्रशासननापया समन्वयलय् सुलासुला दुहांवइपिंत माला कानूनी कारवाहीया प्रक्रिया न्ह्याकेत नं मन्त्रालयं निर्देशन बिउगु दु ।

स्वनिगःया स्थानीय तहतय्सं स्थानीय प्रशासननाप समन्वय यानाः थःथःगु क्षेत्रयय् दुगु होटल, पार्टी प्यालेस, सामुदायिक भवन व मेमेगू थासय् क्वारेन्टाइन दयेकेगु निंतिं लगत संकलन व मेगू व्यवस्थापनया ज्या न्ह्याकेत नं निर्देशन बिउगु दु ।

अथेहे स्थानीय संघसंस्था, क्लवतय्सं बियाच्वंगु सामूहिक राहत वितरण यायेगु ज्या भीडभाडया जोखिम अप्वःगुलिं उगु ज्या स्थानीय तहनाप समन्वय मजूगु खःसा दिकेगु व प्रोटोकल पालना यानाः जक इनेबीत नं मन्त्रालयं धाःगु दु ।