जिथिम्ह अनागारिका माधवी गुरुमां मंत
यल (नेपालभाषा टाइम्स)÷नेपालय् बुद्ध धर्म पलिस्था यायेत आजीवन समर्पित जुयाबिज्याःम्ह अग्रज अनगारिका माधवी गुरुमां म्हिगः मंत । ९२ दँ दुम्ह वसपोल नांजाःम्ह भिक्षु अश्वघोष महास्थविरया केहेँ नं खः ।
वसपोलया सीम्हयात अन्तिम दर्शनया लागिं सुनन्दाराम विहार थैनाय् तयातःगु खःसा थौं न्हिनय् १२ः३० बजे शवयात्रा लिसें अन्त्येष्टि याइगु जूगु दु ।
नेपाल अनागारिका संघया महा सचिव लिसें अनागरिका गुरुमांपिं मध्ये दकलय् जिथिम्ह अनागारिका माधवी गुरुमां १८ दँ दुबलय् कुशीनगरय् भिक्षु ऊ चन्द्रमुनि महास्थविरया उपाध्यायत्वय् गुरुमां जुयाबिज्याःगु खः ।
धर्मकीर्ति विहारया श्रद्धेय धम्मवती गुरुमां बुद्ध धर्मय् प्रव्रजित जुइत छेँनं बिसिउँ वंगु इलय् वसपोल नापं तुं बिसिउँ वंपिं मध्ये छम्ह माधवी गुरुमां नं खः । लिपा माधवी गुरुमांयात भारतं नेपालय् लित ब्वना हःगु खःसा धम्मावती गुरुमां नेपाः लिहां बिमज्यासे जंगलया लँ जुयाः वर्मा बिज्याःगु खः ।
अबलेनिसें करिब ७ दशक थेरवाद बुद्धधर्मया प्रचारय् निरन्तर सक्रिय जुयाबिज्याःम्ह वसपोलं यशोधरा बौद्ध विद्यालय पलिस्था यानाः मिसापिंत नं आखः ब्वंकेमाः धइगु अभियान न्ह्याकाबिज्याःगु खः ।
वसपोलया गृहस्थ नां शुभलक्ष्मी शाक्य खः । वसपोल थः मांया इच्छा कथं हे अनागारिका जुयाबिज्याःगु खः । वसपोलं बुद्ध शिक्षा प्रचार यायेगु लागिं आपालं बौद्ध सफूत नं च्वयाबिज्याःगु दु । नेपालय् मिसापिनि दथुइ बुद्ध धर्म प्रचार यायेगु ज्याय् वसपोलया तःधंगु योगदान दु ।
LEAVE YOUR COMMENTS