राष्ट्रिय सभाया निर्वाचन – समानुपातिकत ल्वाये मदु

येँ (नेपालभाषा टाइम्स)- प्रतिनिधिसभा व प्रदेशसभाया चुनावय् समानुपातिकपाखे बन्दसूचीइ नां दुथ्याःपिं मनूत आः जुइगु राष्ट्रियसभाया चुनावयय् उम्मेदवार जुइ मदइगु जूगु दु । निर्वाचन आयोगं म्हिगः पित बिउगु विज्ञप्तिइ थ्वहे माघ ११ गते जुइगु राष्ट्रियसभाया चुनावय् थ्व स्वयां न्ह्यः जूगु प्रतिनिधिसभा व प्रदेशसभाया चुनावय् समानुपातिक उम्मेदवार जुयाः बन्दसूचीइ नां दुथ्याःपिं मनूत उम्मेदवार जुइ मदइगु खँ धयातःगु दु ।

आयोगया सहप्रवक्ता सूर्यप्रसाद अर्यालं प्रतिनिधिसभा सदस्य निर्वाचन ऐन, २०७४ या दफा ३० व प्रदेशसभा सदस्य निर्वाचन ऐन, २०७४ या दफा ३० कथं व उगु हे दफाया उपदफा (१) या प्रतिबन्धात्मक वाक्यांश कथं नां चीकूगु अवस्थाय् बाहेक राष्ट्रियसभाया उम्मेदवार जुइ मदइगु खँ धयादीगु दु ।

उकथं हे वय्कलं वइगु माघ ११ गते जुइगु राष्ट्रियसभा निर्वाचनया निंतिं आयोगं निर्वाचन ज्याझ्वः स्वीकृत याःगु खँ नं कनादीगु दु । स्वीकृत निर्वाचन ज्याझ्वः कथं वइगु पुस २० गते निर्वाचन अधिकृतया कार्यालयय् मतदाता नामावली पिथनी । पिथंगु मतदाता नामावली उपर दाबी विरोध लगायतया ज्या वकुन्हु हे न्ह्यानाः पुस २२ गते क्वचाइसा पुस २२ गते हे अन्तिम नामावली पिथनी । नामावली आयोगया वेबसाइट व निर्वाचन अधिकृतया कार्यालयं पिथनी ।

उकथं हे पुस २३ गते सुथय् १० बजेनिसें न्हिनसिया ३ बजे तक उम्मेदवार मनोनयन दर्ताया ज्याझ्वः तयातःगु दु । पुस २४ गते उम्मेदवारया विरोधय् उजुरी बीगु, पुस २६ गते अन्तिम नांधलः पिथनेगु ज्याझ्वः दु । पुस २७ गते उम्मेदवारया नां लित कायेगु व वकुन्हु हे न्हिनय २ बजे अन्तिम नांधलः पिथनीगु ज्याझ्वः दु ।

अथे हे पुस २८ गते सुथसिया १० बजे निसें १ बजे तक उम्मेदवारयात निर्वाचन चिं बीगु ज्याझ्वः दु । माघ ११ गते सुथय् ९ बजे निसें न्हिनसिया ३ बजे तक मतदान जुइ । मतदान क्वचायेवं वकुन्हु हे मतगणना नं जुइ । दलतय्सं राष्ट्रियसभाय् दनीपिं उम्मेदवारत धाःसा क्वःछी फयाच्वंगु मदुनि ।

सम्बन्धित बुखँ

LEAVE YOUR COMMENTS