
येँ(नेपालभाषा टाइम्स)( वइगु थिंलाथ्व यःमरि पुन्हिकुन्हु हनीगु ज्यापु दिवसया निंतिं सुकुन्दा र्याली पिथंगु दु । ज्यापु दिवसया प्रचार प्रसारया निंतिं थुगुसी पाःब्वः कयातःगु गोफः त्वालं उगु सुकुन्दा र्याली पिथंगु खः ।
येँ महानगरपालिकाया प्रमुख सुनिता डंगोलं उलेज्या यानादीगु सुकुन्दा ¥याली येँय थीथी लागा चाःहिउगु खः । थुगुसी झिंगुक्वःखुसी हनेत्यंगु ज्यापु दिवसया पाःब्वः लगंस्थित गोफः त्वालं कयातःगु खः । गोफः त्वालं न्ह्याःगु सुकुन्दा ¥याली ब्रम्हूत्वाः आन्दे, न्हूघः, क्वहिति, भिंद्यः त्वाः, मरु, यतखा, न्यत, त्यंगः, थाय्मदु, न्हाय्कंत्वाः, असं जनबहाः, वंघः न्हूसतकं ओमबहाः जुयाः लगमय् थ्यंकाः क्वचायेकूगु खः ।
र्यालीइ येँ महानगरपालिकाया निवर्तमन प्रमुख विद्यासुन्दर शाकय, ज्यापु सांस्कृतिक विकास कोषया नायः मंगलकृष्ण महर्जन, संरक्षकपिं सन्तु महर्जन, प्रचण्डमान वज्राचार्यलगायतया पदाधिकारीलिसें थीथी त्वाःया ज्यापु समदायया सहभागिता दुगु खः ।
२०६१ सालनिसें हना वयाच्वंगु ज्यापु दिवसया मू ज्याझ्वःकथं थिंलाथ्व यःमरि पुन्हिकुन्हु गोफः त्वालं छगू सांस्कृतिक बाजंसहित नगर परिक्रमा यानाः वसन्तपुलिइ थ्यंकाः मू ज्याझ्वः याइगु जूगु दु । ज्याझ्वलय् भाषा, कला, संस्कृति, पहिचान आदिया ख्यलय् विशिष्ट योगदान बियादीपिं थीथी व्यक्तित्वपिंत थीथी सम्मान व सिरपाः लःल्हाइ ।
LEAVE YOUR COMMENTS