मरुसतः दयेकूपिंत ‘केरकार’ यायेगु शैलीया पौ
येँ (नेपालभाषा टाइम्स)÷खय् भासं येँ देय्या नामाकरण जुयाच्वंगु ऐतिहासिक मरुसतः पुनर्निर्माण क्वचाःसां नं सर्वसाधारणया लागिं खुल्ला मयाःगु खँय् स्थानीय वासिन्दा असन्तुष्ट जूगु दु । मरुसतः सर्वसाधारणया लागिं खुल्ला मयाः धकाः स्थानीय वासिन्दां मरुसतःया मू लुखाय् हे हाकुगु ब्यानर तयाः विरोध प्रदर्शन समेत याःगु दु ।
वि.सं. २०७२ सालया तःभुखाचय् पाःताः जुइक दुना वंगु मरुसतःयात येँ महानगरपालिकाया पहलय् पुनर्निर्माण याःगु खः । तर पुनर्निर्माण क्वचाःगु स्वदँ दयेधुंकलं नं थुकियात सार्वजनिक धाःसा मयाःनि ।
येँ महानगरपालिकां धाःसा दयेके क्वचाःगु मरुसतः खुल्ला यायेगु सिबें नं मरुसतः दयेकेगु ज्याय् सक्रिय जूपिंत केरकार यायेगु शैलीं दुःख बीत स्वयाच्वंगु खँ सीदुगु दु । मरुसतः दयेकेत येँ महानगरपालिकां तत्कालिन सांसद राजेश शाक्यया अध्यक्षताय् ‘काष्ठमण्डप पुनर्निर्माण समिति’ गठन यानाः ज्या न्ह्याकूगु खः ।
समितिं बियातःगु ई दुने हे मरुसतः पुनर्निर्माण यानाः मनपायात ताःचा लःल्हाःगु खः । तर येँ मनपाय् आः वःगु न्हूगु नेतृत्वं मरुसतः दयेकूपिंत सुभाय् बीगु पलेसा मरुसतः दयेकूगु इलय् जूगु चिचीधंगु हिसाब समेत मालेगु, मरुसतः दयेकेगु ज्या छु ऐन व नियमय् दुने च्वनाः याःगु धकाः न्यनेकने याना हःगु दु । थुकिया लागिं मनपां छगू समिति हे गठन यानाः केरकार यायेगु शैलीं पुनर्निर्माण समितियात पौ छ्वयेगु ज्या यानाच्वंग खँ सीदुगु दु । ज्या क्वचायेधुंकाः पुनर्निर्माण समितिं थःपिंसं यानागु खर्चया अडिट समेत यानाः मनपायात लःल्हायेधुंकूगु दु ।
लुमंकेबहः जू, भुखाचं ध्वस्त जूगु मरुसतः पुनर्निर्माण यायेगु लागिं १९ करोड ८८ लाख तका दां माली धकाः पुरातत्व विभागं इस्टिमेट याःगु दु । तर पुनर्निर्माण समितिं मुक्कं ११ करोड ५० लाख दामं मरुसतः निर्माण सम्पन्न याःगु खः । लिसें ६७ लाख तकाया सिँ ल्यं दनिगु खँ नं धाःगु दु ।
पुनर्निर्माण समितिया नायः राजेश शाक्यं थःपिंसं ज्या क्वचायेधुंकाः नं मनपां छाय् दुःख बीत स्वयाच्वंगु खः मसिल धयादीगु दु । मरुसतः खुल्ला मयाः धकाः स्थानीयवासी आक्रोशित जुया वःगु खँ कँसें वय्कलं यदि जनतां आक्रोशित जुयाः छुं पलाः ल्ह्वन धाःसा उकिया जिम्मा मनपां काये मालीगु खँ नं कनादीगु दु । वय्कलं मनपायात याकनं हे ल्याःचाःया ज्या क्वचायेकि धकाः नं इनाप यानादीगु दु ।
LEAVE YOUR COMMENTS