पालि–नेपालभाषा खँग्वःधुकू तयार

येँ – बुद्ध धर्मया आपालं मौलिक ग्रन्थत च्वया तःगु पालि भाय् व नेपालभाषाया शब्द–कोश पिहां वइगु जूगु दु । बौद्ध विद्वान ढुण्डबहादुर वज्राचार्यं थ्व शब्दकोश तयार यानाः पिथनादीत्यंगु खः । आः वइगु वैशाख २२ गते छगू ज्याझ्वः यासें शताब्दी पुरुष सत्यमोहन जोशीं सफूया उलेज्या यानादी ।थुकी नेपालभाषा व पालि भाषाया करिब २२ हजार शब्द दुगु खँ भाजु वज्राचार्यं कनादिल ।

थुकी पालि भाय्या नापनापं उकिया अर्थ बीगु नेपाल लिपि, रञ्जना लिपि व थीथी बौद्ध देशय् ल्हाइगु भाय्या लिपि समेत दुथ्याकागु खँ नं वय्कलं कनादिल । पालि व नेपालभाषाया थ्व खँग्वः धुकू पिहां वल धाःसा परियत्ति शिक्षा, त्रिपिटक लिसें बुद्ध धर्मया अध्ययन नेपालभाषां याइपिंत तसकं अःपुइगु व थुकिं थ्व ख्यलय् तःधंगु योगदान बीगु अनुमान यानातःगु दु ।

थ्व स्वयां न्ह्यः भिक्षु अमृतानन्द महास्थविरं नं पालि, नेपालभाषा व खस नेपाली भाय्या छगू शब्दकोश पिकया बिज्याःगु दु । उकिं नं थ्व ख्यलय् यक्व योगदान याःगु खः । अमृतानन्दया थ्व ज्या लिपा मेगु तःधंगु ज्या धइगु थ्वहे जुइगु खँ नं धाःगु दु ।