स्वनिगःया सुरक्षा योजना सार्वजनिक

येँ – महानगरीय प्रहरी परिसर येँपाखें नेपाःमितय् न्ह्यःने वयाच्वंगु तःजिगु मोहनि, स्वन्ति, छठ थेंज्याः नखःयात ध्यानय् तयाः सुरक्षा योजना सार्वजनिक याःगु दु । मोहनि, स्वन्ति थेंज्याःगु नेपाःमितय् महत्वपूर्ण नखःया इलय् जुइफुगु सम्भावित आपराधिक क्रियाकलापयात ध्यानय् तयाः उकियात नियन्त्रण यायेगु ल्याखं उगु योजना सार्वजनिक याःगु खः ।

प्रहरी परिसर येँया प्रमुख लिसें वरिष्ठ प्रहरी उपरीक्षक बसन्त लामां नखः शान्तिपूर्ण व व्यवस्थित यायेगु ल्याखं सुरक्षा योजना सार्वजनिक यानागु जानकारी बियादीगु दु । मोहनि, स्वन्ति व छठ थेंज्याःगु नेपाःमितय् महत्वपूर्ण नखःया इलय् शान्ति सुरक्षायात अझ सुदृढ याना यंकेगु लक्ष्यसहित उगु योजना सार्वजनिक यानागु वय्कलं कनादिल ।

लिसें नखःया इलय् जुइफुगु आपराधिक गतिविधि नियन्त्रणया निंतिं सादा पोशाकय् स्वत्या स्वयां अप्वः सुरक्षाकर्मि परिचालन यायेत्यनागु नं वय्कलं जानकारी बियादीगु दु । नखःया इलय् हत्या, अपहरण, लुटपाट, खुँज्या, डकैती, पाकेटमारी, जू म्हितेगु, अवैध रुपं अय्लाःया विक्री वितरण जुइफुगु, तस्करी, सवारी दुर्घटना, मिसा हिंसा लगायतया घटनायात ध्यानय् तयाः उकियात नियन्त्रण यायेत विशेष सक्रियता व सतर्कता नालेगु नं वय्कलं धयादीगु दु ।