गाडी चले यायेगु निर्णय मजूनि

येँ (नेपालभाषा टाइम्स) – यातायात व्यवस्था विभागं थनिंनिसें सार्वजनिक यातायात चालीगु धाःसां यातायात व्यवसायीतय्सं धाःसा गाडी चले यायेगु बारे छुं निर्णय मजूनिगु खँ धाःगु दु ।

म्हिगः यातायात व्यवस्था विभागय् जूगु सहलह विभागया महानिर्देशक गोगनबहादुर हमालं थनिंनिसें सार्वजनिक यातायात संचालनय् वइगु खँ धयादीगु खः । नेपाल यातायात व्यवसायी राष्ट्रिय महासंघं धाःसा विभागलिसे वार्ता व सहलह जुयाच्वंसां गाडी चले हे यायेगु निर्णय मजूनिगु खँ धाःगु खः ।

महासंघया महासचिव सरोज सिटौलां यातायात मजदूरतय् कोरोना बीमा, चालक, सहचालक व यात्रुतय् स्वास्थ्य सुरक्षा बारे अझं नं सहलह जुयाच्वंगु खँ धयादीगु दु। वय्कलं सार्वजनिक सवारीसाधनपाखें संक्रमण मन्यनेमा धकाः तयारी यानाः जक गाडी चले यायेगु कथं सहलह जुयाच्वंगु खँ धयादीगु दु ।

थ्वयां न्ह्यव सार्वजनिक यातायात केन्द्रीय महासंघया वरिष्ठ उपाध्यक्ष किरणकुमार रिजालं व्यवसायीतय्सं तया वयाच्वंगु माग मौद्रीक नीतिइ दुथ्याःगुलिं थःपिं गाडी चले यायेत तयार जुयागु खँ धयादीगु खः । नेपाल राष्ट्र बैंकं म्हीगः हःगु मौद्रीक नीतिइ थःपिनि अप्वः थें माग दुथ्याःगु खँ वय्कलं धयादीगु खः । सरकारं कोरोना संक्रमणया जोखिमयात ध्यानय् तयाः छगू जिल्लां मेगु जिल्ला वने मदइकथं चिधंगु दूरीइ जक यातायात संचालन याकेगु क्वःछिनातःगु दु। स्वनिगःया हकय् धाःसा स्वंगुलिं जिल्लाय् वनेदइ ।