खुसि मापदण्ड विरुद्ध प्रदर्शन
येँ (नेपालभाषा टाइम्स)÷सर्वोच्च अदालतं खुसि सिथय् थप २० मिटर त्वःतेमाःगु धकाः बिउगु परमादेशया विरुद्ध म्हिगः फिब्व ख्यलय् प्रदर्शन याःगु दु । म्हिगःया प्रदर्शनय् पुलांम्ह मन्त्री लिसें राष्ट्रिय मुक्ति क्रान्ति पार्टीया अध्यक्ष राजेन्द्र महतों नं ब्वति काःगु खः । प्रदर्शनया झ्वलय् प्रदर्शनकारीतय्सं छझाः सतकय् द्यनाः विरोध प्रदर्शन याःगु खः ।
सतक विस्तार पीडित संघर्ष समिति व खुसि मापदण्ड पीडित संघर्ष समितिया ग्वसालय् जूगु ज्याझ्वलय् येँ व यलया थीथी थासं वःपिं पीडिततय्सं ब्वति काःगु खः । थ्व पुचलं सर्वोच्च अदालतया आदेश विरुद्ध निरन्तर प्रदर्शन याना वयाच्वंगु दु । थ्व झ्वलय् अन हे कोणसभा यानाः ज्याझ्वः क्वचायेकूगु खः ।
प्रदर्शनकारीतय्सं सर्वोच्चया आदेशया कारणं थःपिनिगु छेँबुँ हे मदइन धासें उकियात कयाः पुनरावलोकन यायेत माग याना वयाच्वंगु खः । सरकारं वंगु छुं न्हि न्ह्यः थीथी स्वंगू कारण क्यनाः सर्वोच्च अदालतय् पुनरावलोकन यायेधुंकूगु दुसां नं उकिया फैसला मवःतले विरोध प्रदर्शनया थीथी ज्याझ्वः निरन्तर जुइगु खँ संघर्ष समितिं धाःगु दु ।
LEAVE YOUR COMMENTS