‘हरेक जात्रायात अलग अलग कोष दयेका बीमाः’

येँ – गुथि संस्थान अन्तर्गत लानाच्वंगु सम्पत्तित छ्यलाः थीथी जात्रापर्व न्ह्याकेगु लागिं अलग अलग कोष हे स्वनेमाःगु खँ गुथि संस्थानया पुलांम्ह अध्यक्ष लिसें प्रशासक पञ्चलाल महर्जनं धयादीगु दु । थः गुथि संस्थाया अध्यक्ष जुयाच्वंगु इलय् थुकिया लागिं प्रक्रिया न्ह्याकागु खःसां थःगु कार्यकाल फूगुलिं पूवंके धाःसा मफुगु खँ वय्कलं कनादिल ।‘उगु इलय् बुंगद्यःया जात्रा न्ह्याकेत कोष दयेकेगु निंतिं ज्यापु समाज यलनाप सहलह यानागु खः, तर समाजं लिसः बिउगु लिबात गुकिं यानाः ज्या पूवंके मफुत ।’ वय्कलं कनादिल ।

गुथिया कोषयात जात्रा पर्व न्ह्याकीपिनिगु हे अधिनय् तयेमाः धकाः थम्हं उगु पलाः ल्ह्वनागु खँ नं वय्कलं कनादिल ।थुकिया बारे ज्यापु समाजया पुलांम्ह नायः मंगल महर्जनयाके न्यनाबलय् वय्कलं अबले बुंगद्यः जात्रा न्ह्याकेत कोष दयेकेगु खँ जुयाच्वंगु खःसां पञ्चलाल महर्जनया कार्यकाल फूगुलिं खँ न्ह्याके मफुत, तर आः हाकनं थ्व खँयात न्ह्यःने यंकेगु जुइ धयादिल । वय्कलं धयादी, ‘आः नं जात्रा न्ह्यःने वयाच्वंगु दु । कोष स्वनेगु निंतिं कुतः यायेमाः ।’

स्वनिगःया जात्रा पर्व न्ह्याकेगु निंतिं थीथी गुथि स्वनातःगु दुसां उमिके थःगु हे आम्दानी स्रोत धाःसा मदु । गुलिखें जात्रापर्व न्ह्याकेत गुथि संस्थानं ध्यबा बियातःगु खसां उगु ध्यबा पर्याप्त धाःसा मजू । थज्याःगु खँयात वाःचायेकाः हे थम्हं कोष दयेकेगु अवधारणा हयागु खँ नं संस्थानया पुलांम्ह अध्यक्ष महर्जनं कनादिल ।गुथि संस्थान थौंकन्हय् जात्रा पर्व न्ह्याकेगु स्वयां नं अन ज्या याइपिं कर्मचारीतय्त तलब नकेगु थाय् जक जुयाच्वंगु द्वपं नं वय्कलं बियादिल । वि.सं.२०२१ सालय् गुथि संस्थान स्वनाः सरकारं गुथिया फुक्क हे जग्गा व सम्पत्ति सरकार मातहत हःगु खः ।