एकता दिवस बलम्बुइ

येँ(नेपालभाषा टाइम्स)- थुगुसी नेवाः एकता दिवसया ज्याझ्वः चन्द्रागिरि नगरपालिकाया बलम्बुइ याइगु जूगु दु । एकता दिवसया संयोजन याना वयाच्वंगु सरोकारवालातय् मुँज्यां थुगुसी एकता दिवसया ज्याझ्वः बलम्बुइ यायेगु क्वःछिउगु खः ।

नेवाः एकता दिवसया संयोजन याना वयाच्वंगु नेवाः देय् दबुलिं थ्व स्वयां न्ह्यः थुगुसी एकता दिवसया ज्याझ्वः चन्द्रागिरि नगरपालिकाय् यायेगु क्वःछिउगु खः । थुगुसी १३ क्वःगु नेवाः एकता दिवस चन्द्रागिरि नगरपालिकाया बलम्बुइ यायेगु क्वःछिउगु खः । थ्व हे वइगु पोहेलाथ्व नवमि (पुस १६) गते शनिवाः कुन्हु जुइगु एकता दिवसया झ्वलयय् छगू तःजिगु ¥याली पिथनाः बलम्बुइ सभा यायेगु नेवाः देय् दुबलिं जानकारी बिउगु दु ।

नेवाः देय् दबूया संयोजनय् थीथी जातीय खलः, पुचःलिसें थीथी संघसंस्थाया ग्वसालय् दँय्दसं नेवाः स्वायत्त राज्य घोषणा याःगु दिंया लुमन्तिइ नेवाः एकता दिवस हना वयाच्वंगु दु ।

थुगुसी नेवाः देय् दबू चन्द्रागिरि नगरपालिका व श्रीज्यापु महागुथि चन्द्रागिरि नगरपालिकाया मंकाः व्यवस्थापनय् बलम्बुइ नेवाः एकता दिवसया ज्याझ्वः यायेगु ल्याखं तयारी न्ह्यानाच्वंगु दु ।
थनिं झिंस्वदँ न्ह्यः नेवाः स्वायत्त राज्य मंकाः संघर्ष समितिया ग्वसालय् थनया त्रिपुरेश्वरय् च्वंगु दशरथ रंगशालाय् लखौं नेवाःतय् उपस्थितिइ नेवाः स्वायत्त राज्य घोषणा याःगु दिंया लुमन्तिइ एकता दिवस हनावयाच्वंगु खः ।