कृषि व शिक्षाय् ग्वाहालि अप्वयेकेगु माेदीया प्रतिबद्धता

येँ- भारतीय प्रधानमन्त्री नरेन्द्र मोदीं नेपाःया विकासया निंतिं भारतीय साझेदारीया इतिहास ताःहाकः जूगु न्ह्यथनादिसें आः नं थज्याःगु ग्वाहालि निरन्तर दयाच्वनीगु प्रतिबद्धता प्वंकादीगु दु ।

प्रधानमन्त्री केपी ओलीया भारत भ्रमणया झ्वलय् वय्कःयात नापलानादिसें भारतीय समकक्षी मोदीं थ्व खँ धयादीगु खः । लिसें वय्कलं नेपाःया राजनीतिक इतिहास न्हूगु युवय् दुहां वंगु दु धासें थ्व भारतया निंतिं नं लसताया खँ जूगु खँ धयादीगु दु ।

तर नेपाः न्हूगु राजनीतिक लँय् न्ह्याःवनेत जारी याःगु संविधानयात कयाः धाःसा मोदीं थ्वयां न्ह्यः नेपाःयात नाकाबन्दी तकं तयाबिउगु खः । तर शनिवाः थःगु संवोधनय् धाःसा वय्कलं नेपाः न्हूगु चरणय् दुहां वंगु धासें लसता प्वंकादीगु खः ।

वय्कलं भारत नेपाःया विकासय् साझेदार जुइफइगु धयादिसें विकास सम्बन्धी नेपाःया प्रधानमन्त्री केपी शर्मा ओली व थःगु परिकल्पना थःथवय् पूरक जूगु खँ नं न्ह्यथनादीगु खः । वय्कलं विकासय् भारतीय साझेदारी प्राथमिकता व आवश्यक्ताय् आधारित जुइगु खँ नं स्पष्ट यानादीगु दु । थ्व झ्वलय् वय्कलं आः भारतलिसे जमिन व हवाई जक मखु जलमार्गपाखें नं स्वाइगु खँ धयादीगु खः ।

अथेहे वय्कलं कृषिइ न्हूगु साझेदारी जुइगु धयादिसें अग्र्यानिक खेती, कृषि अनुसन्धान व शिक्षाय् ग्वाहालि अप्वयेकेगु घोषणा नं यानादीगु खः । लिसें अरुण स्वंगूगु, पञ्चेश्वर सम्बन्धी ज्या तीव्र गतिं न्ह्याकेगु न्ह्यथनादिसें खुला सीमाया दुरुपयोग पनेत नं सहमति जूगु खँ धयादीगु दु ।

मोदीया सम्बोधन लिपा सम्बोधन यानादीम्ह प्रधानमन्त्री केपी ओलीं आः नेपाः राजनीतिक संक्रमण क्वचायेकाः आर्थिक विकासया न्हूगु चरणय् दुहां वंगु खँ धयादीगु खः ।