शाक्य महाविहार संघया न्हापांगु महाधिवेशन
येँ – शाक्य महाविहार संघं थीथी क्षेत्रय् योगदान बियादीपिं नीम्ह शाक्य कुलपुत्र व कुलपुत्रीयात ‘राष्ट्रिय शाक्य सम्मान’ लःल्हाइगु जूगु दु । अथे हे शाक्य समुदायया ऐतिहासिक पर्वकथं कयातःगु ‘शाक्य संगायना’ ज्याझ्वःया नं ग्वसाः ग्वइगु जूगु दु । शाक्य महाविहार संघया न्हापांगु अधिवेशनया झ्वलय् उकथंया ज्याझ्वः यायेगु बारे जानकारी बिउगु खः ।
संघया महासचिव संघरत्न शाक्यं शाक्य व वज्राचार्यतय् बहाः बहीया अनुसन्धान यानाः ऐतिहासिक तथ्य संकलन यायेगु व उकिया अभिलेखीकरण यायेगु नापं वइगु साउन महिनाय् गुंला पर्वया झ्वलय् धाःबाजंया ब्वज्या नं यायेगु जानकारी बियादीगु खः ।
संघया न्हापांगु अधिवेशनय् शाक्यवंशया पहिचानया निंतिं उत्कृष्ट योगदान बियादीपिं कीतिपुण्य महाविहार, लगंबहाःया हर्षमुनि शाक्ययात ‘शाक्य रत्न’ व मैत्रीपुर महाविहार, क्वाःबहाःया चक्रेश्वर धूपरत्न शाक्ययात ‘ध्रुवतारा सम्मान’ नं लःल्हाःगु खः ।
ज्याझ्वलय् नवासें येँ जिल्लापाखें प्रदेश नं. ३ या प्रदेशसभा सदस्य राजेश शाक्यं स्वनिगः दुनेया महाविहारया मौलिक स्वरुप ल्यंका तयेत व सरकारपाखें नियमित रुपं आर्थिक ग्वाहालि कायेत छगू महाविहार व्यवस्थापन समिति गठन यायेमाःगु आवश्यक जूगु खँँय् बः बियादिल । अथे हे यल जिल्लाया प्रदेशसभा सदस्य शोभा शाक्यं शाक्य व वज्राचार्यतय्गु थःगु थाय्बाय्, बहा व बही त्वःताः मेगु थासय् च्वं वनेगु उचित मजूगु विचाः प्वंकादिल ।
नदी संगम महाविहार सर्वसंघ,खुसिबहीया अध्यक्ष रत्नमान शाक्य, लुम्बिनी बौद्ध विश्वविद्यालयया पूर्व उपकुलपति प्रा. डा. नरेशमान वज्राचार्य व बौद्ध विहार संघ यलया नायः पुष्परत्न शाक्यं लगायतं संघया न्हापांगु अधिवेशनया सफलताया कामना यासें भिंतुना न्वचु बियादीगु खः ।
अधिवेशनं शुभकाजी शाक्यया अध्यक्षताय् संघया न्हूगु ज्यासा पुचः नं ल्यःगु खः । झिंन्याम्हेसिया न्हूगु ज्यासना पुचलय् अमीरमान शाक्य व गौतम शाक्य न्वकु, संघरत्न शाक्य मूछ्यांजे, राजेश शाक्य छ्यांजे, चैतन्यराज शाक्य दांभरिं व दीलिपरत्न शाक्य लिउदांभरिं पदय् निर्विरोध निर्वाचित जुयादीगु दु ।
अथे हे दुजलय् विजयरत्न असंबरे, रोशनबहादुर शाक्य, सुरेश शाक्य, आनन्दरत्न शाक्य, धर्मरत्न शाक्य, अमिरकुमारि शाक्य, दुर्गादेवी शाक्य व ज्योति शाक्य निर्वाचित जुयादीगु दु ।
LEAVE YOUR COMMENTS