ने. सं. ११४४ कौलाथ्व पारू - नःलास्वनेगु

समुदाय–प्रहरी साझेदारी कार्यक्रम सुरु

येँ – नेपाल प्रहरीं ‘हर प्रहर गाउँ व नगरी, टोलटोलय् नेपाल प्रहरी’ धयागु नारा बिया देन्यंकं समुदाय प्रहरी साझेदारी कार्यक्रम सुरु याःगु दु । आइतवाः भृकुटी मण्डपय् छगू ज्याझ्वःया दथुइ गृहमन्त्री रामबहादुर थापा थुगु ज्याझ्वःया सुभारम्भ यानादीगु खः । प्रहरीं स्थानीय तह, समुदाय, सामाजिक संघसस्था व विद्यालयलिसे साझेदारी यानाः थ्व ज्याझ्वः न्ह्याकीगु खँ धाःगु दु ।

ज्याझ्वलय् कार्यक्रमया बारे जानकारी बियादिसें प्रहरी महानिरीक्षक सर्वेन्द्र खनालं शान्ति सुरक्षाया निंतिं समुदायलिसे हे समन्वय याना वनेमाःगु अवधारणा कथं थ्व ज्याझ्वः सुरु यानागु खँ कनादिसें थुकिं समृद्ध नेपाल व सुखी नेपाल दयेकेगु सरकारया लक्ष्य चूलाकेत ग्वाहालि जुइगु विश्वास नं प्वंकादिल ।

अपराध पनेगु, समुदायय् सुरक्षाबारे सचेतना बीत, शान्ति व सुव्यवस्था कायम यायेत समुदायय् हे केन्द्रीत जुयाः ज्या न्ह्याकेगु खँ नं वय्कलं धयादिल । वय्कःया कथं थ्व कार्यक्रमयात दिगो व दिर्घकालिन दयेकेत स्थानीय निकाययात प्रमुख साझेदार दयेकूगु दुसा मस्त व ल्याय्म्हत अपराधया उच्च जोखिमय् लानाच्वंगुलिं विद्यालय केन्द्रीय कार्यक्रमयात प्राथमिकता बियाः न्ह्याकीगु जुइ ।

वय्कलं धयादीगु दु, ‘स्कुल वनीपिं चिधिकःपिं मस्त स्वयां १६ निसें २५ दँया विद्यार्थीत अपराधय् संलग्न जुइगु तथ्यांक पिहां वयाच्वंगु दु । अथेहे झिंच्यादं क्वय्यापिं मस्त नं बलात्कारया शिकार जुयाच्वंगु दु । नेपाःया जनसंख्याया ४० प्रतिशत मनूत छुं न छुं कथं स्कुललिसे आवद्ध जुयाच्वगु दइ । उकिं स्कुलयात प्राथमिकता बियाः ज्याझ्वः संचालन यायेगु जुइ ।’

थ्व ज्याझ्वः सफल यायेगु निंतिं त्वाःत्वालय् प्रहरी थ्यंकेगु, नागरिक मैत्री प्रहरी सेवा बीगु, समुदाय व विद्यालयय् सचेतना कार्यक्रम चले यायेगु लिसें स्थानीय तह लिसे समन्वय यानाः स्कुलय् सामुदायिक सुरक्षा पाठ्यक्रम लागू यायेगु खँ नं वय्कलं धयादिल ।थ्व ज्याझ्वलय् ७५३ गू स्थानीय निकायया झिद्वः सामाजिक संस्था, ७५ लाख विद्यार्थी, ३६ हजार विद्यालय, प्यंगू लाख शिक्षक, ७५ हजार प्रहरी व ४० हजार अभिभावकत प्रत्यक्ष रुपं संलग्न जुइगु खँ धाःगु दु ।

ज्याझ्वलय् न्ववानादिसें गृहमन्त्री थापां समुदायलिसे साझेदारी याना वन धाःसा जक दिगो शान्ति कायम जुइगु खँ धयादिसें नेपाल प्रहरीं हःगु अवधारणां कथं थ्व ज्याझ्वः सुरु जूगु न्हि ऐतिहासिक न्हि जुइगु खँ धयादिल अथेहे येँ महानगरपालिकाया मेयर विद्यासुन्दर शाक्यं प्रहरी नागरिक साझेदारीं शान्ति सुरक्षा प्रभावकारी जुइगु खँ धयादिल ।