लुम्बिनीइ त्रिपिटक पाठया तयारी

येँ (नेपालभाषा टाइम्स)- अखिल नेपाल भिक्षु महासंघया ग्वसालय् वइगु फागुन २० गतेनिसें २२ गते तक लुम्बिनीइ त्रिपिटक वाचन याइगु जूगु दु । म्हिगः थुकिया बारे विश्वशान्ति विकारय् छगू पत्रकार सम्मेलन यासें महासंघया अध्यक्ष भिक्षु धम्मसोभन महास्थविरं भगवान बुद्धया जन्मस्थल बारे न्यनाच्वंगु भ्रमयात फायेत व लुम्बिनीया पहिचान न्यंकेत थुगु अन्तर्राष्ट्रिय त्रिपिटक वाचन ज्याझ्वलं ग्वाहालि जुइगु विश्वास प्वंकाबिज्यात ।

भगवान बुद्धं थःगु जीवनकालय् उपदेश बियाबिज्याःगु ८४ हजार धर्मस्कन्धत सूत्रपिटक, विनयपिटक व अभिधर्मपिटक यानाः स्वंगू ब्वय् ब्वथलातःगु दु । भारतया बुद्धगयाय् दँय्दसं झिन्हु तक त्रिपिटक पाठ यायेगु चलन दुसा मेमेगु देशय् नं इलय् ब्यलय् त्रिपिटक पाठ यायेगु याइ ।

पत्रकार सम्मेलनय् महासंघया महासचिव भिक्षु धर्मगुप्त महास्थविरं विश्वन्यंक शान्ति व मैत्रीया सन्देश न्यंकेगु आज्जु कथं थुगु स्वक्वःगु अन्तर्राष्ट्रिय त्रिपिटक वाचन ग्वसाः ग्वयागु खँ कनाबिज्यात ।

ज्याझ्वः कथं न्हापांगु न्हि फागुन २० गते समुद्घाटन ज्याझ्वः स्वयां न्ह्यः सुथय् ८ बजे शोभायात्रा पिकाइसा फागुन २२ गते बहनी दीप प्रज्वलन यानाः ज्याझ्वः क्वचायेकी । थुगु ज्याझ्वलय् १२ गू देय्या बौद्ध धर्मगुरु, भिक्षु व प्रतिनिधितय्सं ब्वति काइगु खँ धाःगु दु ।

भिक्षु महासंघया सचिव भिक्षु निग्रोध महास्थविरया कथं थुगु ज्याझ्वलय् ११५० म्हेसित प्रवज्या बियाः उमित त्रिपिटक वाचन ज्याझ्वलय् ब्वति कायेकीगु नं ग्वसाः दु ।
उकथं हे भिक्षु महासंघपाखें लुम्बिनीइ निगूगु चरणया दयेकेगु ज्या क्वचाःगु संघवासया उलेज्या याइगु नं ज्याझ्वः दु ।

सम्बन्धित बुखँ

LEAVE YOUR COMMENTS