१२ कक्षाया जाँच कायेत निर्देशन

येँ – संसदया शिक्षा तथा स्वास्थ्य समितिं भौतिक उपस्थितिइ हे १२ कक्षाया परीक्षा कायेत निर्देशन बिउगु दु । म्हिगः संसदया शिक्षा तथा स्वास्थ्य समितिया बैठकय् शिक्षा मन्त्रालयया पदाधिकारीतलिसे सहलह यासें समितिया सभापति जयपुरी घर्तीं कोरोना विरुद्धया खोप बियाः भौतिक उपस्थितिइ जाँच कायेत निर्देशन बियादीगु खः ।

कोरोना संक्रमणया जोखिम अप्वया वनाच्वंगु धासें स्थगित जुयाच्वंगु १२ तगिंया परीक्षा भौतिक उपस्थितिइ हे कायेगु तयारी जुयाच्वंगु खँ शिक्षा मन्त्रालयं धाःगु दु । शिक्षा मन्त्रालयया सचिव रामप्रसाद थपलियां स्वास्थ्य मन्त्रालयलिसे सहलह यानाः मोहनि न्ह्यः भौतिक उपस्थितिइ हे परीक्षा कायेगु तयारी जुयाच्वंगु खँ धयादीगु दु ।

१२ तगिंया लागिं जाँच बीपिं ३ लाख ९६ हजार विद्यार्थीत सकलें झिंच्यादँ च्वय्यापिं जूगुलिं उमिगु निंतिं खोप बीफइगु खँ कँसें वय्कलं खोपया नितिं स्वास्थ्य मन्त्रालयलिसे सहलह यायेत्यनागु जानकारी नं बियादिल । थौंकन्हय् भौतिक उपस्थितिइ हे परीक्षा कायेगु लकस ब्वलनाच्वंगु धासें मन्त्रालयया सल्लाहया आधारय् परीक्षा कायेगु खँ नं धयादिल ।