उपप्रमुखपाखें डेंगू संक्रमितया स्वास्थ्य अवस्था बारे जानकारी

ख्वप (नेपालभाषा टाइम्स)- स्वनिगलय् लिपांगु इलय् डेंगू संक्रमित ल्वगितय् ल्याः अप्वया वनाच्वंगु दु । डेंगूया विरामीत अप्वया वनेवं स्वनिगःया आपालं अस्पतालया बेड नं जाया वःगु दु ।

छुं ई न्ह्यः तक येँ व यलय् डेंगूया विरामीत अप्वया वनाच्वंगु थासय् आः ख्वपय् नं थुकिया संक्रमितत गाक्कं अप्वया वनाच्वंगु दु । थ्व हे कारणं ख्वप नगरपालिकापाखें संचालन जुयाच्वंगु ख्वप अस्पतालय् वंगु छवाः थुखे डेंगूया विरामीं जाया वःगु दु ।

थ्व हे झ्वलय् ख्वप नगरपालिकाया उपप्रमुख रजनी जोशीं ख्वप अस्पतालय् वनाः डेंगूया संक्रमित विरामीयात नाप लानाः इमिगु स्वास्थ्य अवस्था बारे जानकारी कयादीगु दु । उपप्रमुख जोशीं अस्पतालय् वासः याकाच्वंपिं डेंगूया विरामीयाके इमित जुयाच्वंगु समस्या, उपचार, स्वास्थ्य अवस्था बारे जानकारी कयादीगु खः ।

वंगु छवाः दुने डेंगू पहिचान जुयाः अस्पतालय् भर्ना जूपिं ११६ म्ह विरामीमध्ये १०१ म्ह उपचार लिपा डिस्चार्ज जुइधुंकूगु, निम्हेसित मेगु अस्पतालय् रिफर याःगु व १३ म्ह अस्पतालय् उपचार यानाच्वंगु ख्वप नगरपालिकां जानकारी बिउगु दु ।

मेखे ख्वप नगरपालिकां डेंगू ल्वय्या रोकथाम व नियन्त्रणया निंतिं जनचेतनामूलक ज्याझ्वः याना वयाच्वंगु दु । नगरपालिकां सचेतना ¥याली, जनचेतन अभिवृद्धि, नगर दुने विशेष सरसफाइ अभियान, वासः

छ्वाकेगु, पर्चा पम्पलेट वितरण आदि ज्या याना वयाच्वंगु दु । थुकथं हे माइकिंग यानाः सूचना प्रवाह यायेगु, ख्वप सः ज्याझ्वलय् विशेषज्ञ चिकित्सकत खँल्हाबल्हा प्रशारण, लः मुनीगु थासय् लार्भा नष्ट यायेगु, स्वास्थ्य स्वय्मसेवीका परिचालन यायेगु ज्याझ्वः नं नगरपालिकां याना वयाच्वंगु दु ।