४१ गू राजनीतिक दल खारेज

येँ- निर्वाचन आयोगं ४१ गू राजनीतिक दलया दर्ता खारेज याना बिउगु दु । आयोगया मंगलवाः च्वंगु बैठकं ४१ गू राजनीतिक दलया दर्ता खारेज यायेगु निर्णय याःगु खः ।
आयोगं साउन २० गतेनिसें लागू जुइकथं आयोगय् दर्ता जुयाच्वंगु ४१ गू राजनीतिक दलया दर्ता खारेज यायेगु निर्णय याःगु आयोगया प्रवक्ता राजकुमार श्रेष्ठं जानकारी बियादीगु दु ।

दल दर्ता खारेज जूगुलिइ नेपाः राट्रिय पार्टी (नेपाः पार्टी) नं दुथ्यानाच्वंगु दु । आयोगया प्रवक्ता श्रेष्ठं दल दर्ता खारेज जूगु धलः सहितया विज्ञप्तीइ उगु खँ न्ह्यथनातःगु दु ।
४१ गू राजनीतिक दलया दर्ता खारेज जुइवं आः ९५ गू दलया जक दर्ता कायम जूगु दु । आयोगं दल दर्ता खारेजलिसें प्रत्येक राजनीतिक दलयात ५० द्वः तका दां जरिवाना यायेगु नं क्वःछिउगु दु ।

प्रवक्ता श्रेष्ठयाकथं दर्ता खारेज जूगु दलं जरिवाना मपूतले अज्याःगु दलया केन्द्रीय पदाधिकारीतय्सं मेगु दल दर्ता याये मदइगु व दर्ता जुयाच्वंगु मेगु गुगुं नं दलया पदाधिकारी नं जुइ मदइगु जूगु दु ।