मनपाया नांग्वरःयात आलोचना

येँ (नेपालभाषा टाइम्स)- येँ देय्या थीथी त्वालय् पुलांगु हे मौलिक नां तयेगु धकाः येँ महानगरपालिकां न्ह्याकूगु ज्या अःखः जूगु दुसा उकियात कयाः सामाजिक सञ्जालय् ब्यापक आलोचना जूगु दु ।

मनपां येँया थीथी लागाय् अनया पुलांगु हे नां छ्यलेगु धकाः थीथी त्वालय् आकर्षक थां दयेकाः नां ग्वरः तया हःगु खः । तर ज्या बांलाःगु खःसां अज्याःगु नां ग्वरलय् पुलांगु नां रञ्जना लिपिं तयाः न्हूगु नां धाःसा देवनागरी व अंग्रेजी आखलं तःगु खनेवं स्थानीय मनूतय्सं उकिया आलोचना याना हःगु खः । येँया थीथी त्वाःबस्तीया पुलांगु नां पुनर्जीवित यायेगु खःसा अन पुलांगु हे जक नां तयाः उगु पुलांगु नां नं देवनागरी व अंग्रेजी आखलं तयेमाः धकाः सः थ्वयेका हःगु खः ।

पुलांगु नां रञ्जना लिपिं तयाः न्हूगु नां देवनागरी व अंग्रेजी आखलं तयेबलय् थुकिं झन् भ्रम ब्वलंकीगु व न्हूगु नांयात स्थापित याना यंकीगु खनेदुगु खँ स्थानीय मनूतय्सं धाःगु दु ।

दसुकथं वंद्यः त्वालय् तये हःगु ग्वरलय् रञ्जना लिपिं ‘वंघः’ च्वयाः अंग्रेजी व देवनागरीं ‘इन्द्रचोक’ धकाः तये हःगु खः । स्थानीय मनूतय्सं यदि पुलांगु नां पुनस्र्थापना यायेगु खःसा स्वंगुलिं लिपिं ‘वंघः’ धकाः हे तयेमाः धकाः माग याःगु दु । उलि जक मखु उगु लागाय् चायेकातःगु थीथी पसः व संस्थाया साइनबोर्डय् नं ‘इन्द्रचोक’ मधासे ‘वंघः’ च्वके बीमाः धकाः नं सुझाव बिउगु दु ।

थ्वहे झ्वलय् मनपा सूत्रं धाःकथं थःपिंसं तयागु नांग्वरःयात सामाजिक सञ्जालय् ब्यापक आलोचना याना हयेवं मनपां थःगु गल्ती महसुस यानाः थ्व ग्वरः हिलेगु तयारी यानाच्वंगु दु । सम्भव दत धाःसा मनपां थनिंनिसें हे थ्व ग्वरः हिलाः अन पुलांगु हे जक नां दुगु ग्वरः तयेगु ज्या न्ह्याके फुगु खँ धाःगु दु ।