देउवायात माधव नेपालया बचं

येँ- न्हूम्ह प्रधानमन्त्रीया रुपय् नेपाली कांग्रेसया सभापति शेरबहादुर देउवा नियुक्त जुयादीसां थ्व सरकार आः गय् यानाः सञ्चालन जुइ धइगु खँ धाःसा हानं नं माधव नेपालया हे निर्णयलय् वयाः निर्भर जू वःगु दु । यदि नेता नेपालं समर्थन यात धाःसा देउवाया सरकार पूर्ण कार्यकाल चले जुइ । नेपाल पक्षं समर्थन मयात धाःसा देउवायात बहुमत गाइ मखु । उकिं वय्कलं नं दथुइ हे राजीनामा बियाः चुनाव घोषणा याये मालीगु अवस्था पिहां वइ ।

थ्वहे खँयात कयाः सहलह यायेत म्हिगः नवनियुक्त प्रधानमन्त्री शेरबहादुर देउवा माधव नेपालया छेँय् वनाः खँल्हाबल्हा यानादीगु खः । खँल्हाबल्हाय् नेता नेपालं प्रधानमन्त्री देउवायात थःपिंसं विश्वासया मत बीगु बचं बियादीगु खँ धाःगु दु ।

नेता नेपालं सर्वोच्च अदालतया फैसला लिपा थःपिं आः विपक्षी गठबन्धनय् च्वने फइ मखुत धकाः स्पष्ट यानादीधुंकूगु दु । तर एमाले दुने वय्कःया विरोधय् हानं सः पिहां वःगुलिं माधव नेपाल पक्षया निर्णय छु जुइ धइगु खँ स्पष्ट मजूनि ।