पचली जात्राया निंतिं अक्षय कोष
येँ(नेपालभाषा टाइम्स)- मोहनि नखःया झ्वलय् जुइगु पचली भैरव (त्यप आजु)या जात्राय् येँ महानगरपालिकां सहजकर्ताया भूमिका म्हितीगु जूगु दु । कौलाथ्व पंचमि (पचिम¥हः) कुन्हु जुइगु जात्राय् महानगरं सहजकर्ताया भूमिका म्हितेगु निर्णय याःगु खः ।
येँ महानगर उपप्रमुख सुनिता डंगोलया अध्यक्षताय् महानगर प्रमुख बालेन्द्र शाहया प्रमुख आतिथ्यताय् च्वंगु जात्रा समन्वय बैठकं उकथंया निर्णय याःगु खः । महानगर प्रमुख शाहं पचलि भैरवया महिमा, बाखं व ऐतिहासिकता बारेन्यने खंगु व थुइके खंगुलिं लसता प्वंकादिसें थ्व जात्रायात नं येँयाः थें हे महत्व बियाः हनेमाःगु धारणा बैठकय् तयादीगु खः ।
येँ देय्या जत्रा, पर्वलिसें थनया संस्कार व संस्कृति प्रवद्र्धनया निंतिं योग्य जू धासें थज्याःगु धार्मिक, सांस्कृतिक महत्वया सम्पदात पर्यटनया निंतिं बांलाःगु पूर्वाधार जूगु वय्कलं कनादिल ।
उपप्रमुख डंगोलं स्वतःस्फूर्त रुपय् जात्रा संचालन यायेत महानगरपालिकां आर्थिकलिसें आवश्यककथं प्राविधिक ग्वाहालि नं यायेगु जुइ धासें जात्राया निरन्तरताया निंतिं ५०गू लखया अक्षय कोष स्थापना यायेत बजेटया व्यवस्था यानागु खँ कनादीगु दु ।
जात्राया इलय् करं क्यनाः जक पुजा यायेगु यात धाःसा जात्राया मौलिकता स्यना वनी धासें उपप्रमुख डंगोलं मौलिकता ल्यंका तयेगु सकसिगुं जिम्मेवारी जुइगु व जात्राय् खटे जुइपिं स्वयंसेवकतय्सं मद्यपान मयायेत इनाप यानादिल ।
सम्पदा व पर्यटन समितिया संयोजकलिसें ८ वडाअध्यक्ष आशामान संगतं जात्रा संचालन जुइगु लँपुइ सवारी साधनयात निषेध यायेमाः धासें थज्याःगु जात्रायात स्थानीय रुपय् जक सीमित मयासे राष्ट्रिय जात्राया रुपय् हनेमाःगु विचाः तयादिल ।
व्यवस्थापन समितिया अध्यक्षतकं जुयाच्वनादीम्ह १२ वडाअध्यक्ष बालकृष्ण डंगोलं झण्डै निगू दशकतक सहभागि मजुयाच्वंगु रुद्रविनायक यात २०७१ सालय् समिति गठन यानाः हाकनं सहभागि याकेगु ज्या जुयाच्वंगु जानकारी बियादिल ।
कौलाथ्व पंचमिकुन्हु पचलि भैरवया मू जात्रा जुइगु खःसां विधिवत रुपं जात्रा धाःसा थनिंनिसें शुरु जुइ । विहीवाःकुन्हु द्यः बिज्याकेगु ज्या जुइसा थ्वकुन्हु पचलि भैरवयात क्वहितिस्थित थकु जुजुया छेँय् यंकी ।
LEAVE YOUR COMMENTS