येँय् पीसीआर याःपिं ७० प्रतिशत पोजिटिभ !
येँ (नेपालभाषा टाइम्स)÷येँ महानगरपालिकाय् पीसीआर टेष्ट याःपिं मध्ये ७० प्रतिशतयाके कोरोना पोजिटिभ खने दुगु दु । येँया थ्व कोरोना ल्याःचाःयात तसकं ग्यानापुगु अवस्था धकाः थन थुइका हःगु दु ।
थ्वहे झ्वलय् येँ मनपाय् थौंकन्हय् १० द्वः स्वयां अप्वः सक्रिय संक्रमितत दुगु खँ तथ्यांक नं सार्वजनिक जूगु दु । थुकी अप्वः छुं मनूत अस्पतालय् वासः याकाच्वंगु दुसा मेपिं छेँय् हे होम आइसोलेसनय् च्वनाच्वंगु दु । अथेहे येँ मनपाय् आः तक ५१ द्वः ४१२ म्ह कोरोना भाइरसपाखें संक्रमित जूगु दु । उकी मध्ये १० द्वः ८०१ म्ह सक्रिय संक्रमित दु । थुकी मध्ये नं दकलय् अप्वः वडा नं. ३२ य् ४,७५५ म्ह सक्रिय संक्रमित दुसा दकलय् म्हो वडा १८ य् २०७ म्हेसिके कोरोना पुष्टि जुइधुंकूगु दु ।
थ्वहे झ्वलय् येँ मनपां कोभिड–१९ या संक्रमण विरुद्ध ल्वायेगु लागिं कामपा क्षेत्र दुनेया १२ गू अस्पतालतय्गु क्षमता अप्वयेकेगु लागिं सम्झौता याःगु दु । कामपां वीरेन्द्र सैनिक अस्पताल, वीर अस्पताल, क्षेत्रपाटी निःशुल्क चिकित्सालय, निजामती कर्मचारी अस्पताल, महेन्द्र नारायण निधि मेमोरियल अस्पताल, हेल्पिङ ह्याण्ड्स सामुदायिक अस्पताल, शहीद गङ्गालाल राष्ट्रिय हृदयरोग केन्द्र, शुक्रराज ट्रपिकल तथा सरुवा रोग अस्पताल, मोडल अस्पताल र नेपाल कोरिया मैत्री अस्पताललिसे अज्याःगु सम्झौता याःगु खः ।
थ्व स्वयां न्ह्यः मनपां शिक्षण अस्पताललाई झिगः भेन्टिलेटर बीधुंकूगु दुसा नरदेवी आयुर्वेदिक अस्पताललिसे नं अक्सिजन सहितया उपकरण जडान यायेगु सम्झौता यायेधुंकूगु दु ।
LEAVE YOUR COMMENTS