ने. सं. ११४४ कछलागा तृतीया -

खायागु खिपाखें ग्याँस, बिजुली व साः उत्पादन

येँ – नेपाःया हे दकलय् तःधंगु पोल्ट्री फार्म धया तःगु स्यांजाया खिलङ कालिका एग्रो फार्म प्रा।लिं। थौंकन्हय् खा लहीगु जक मखु, अन लहिना तःपिं खाया खिपाखें ग्याँस व विजुली पिकयाः बजारय् मीगु ज्या समेत सुरु याःगु दु । थ्व फार्मय् करिब निगू लाख खा लहिना तःगु दु । उपिंपाखें वइगु खि अनया आँधीखोलाय् वांछ्वत धकाः छक्वः उगु फार्मयात कारवाही समेत याःगु खः ।

वयां लिपा थ्व खियात गय् यानाः व्यवस्थापन याये फइ धकाः बिचाः यायां अन्तय् उकियापाखें उर्जा पिकायेगु ज्या सुरु याःगु खः ।
थौंकन्हय् थ्व खिपाखें फार्मं न्हिं ३५० किलोवाट मत उत्पादन यानाच्वंगु दु । थ्व मत फुक्क फार्मयात माःगु आन्तरिक ज्याय् प्रयोग जुयाच्वंगु दु । थःपिंसं हे मत उत्पादन याइगु जूगुलिं फार्मयात आः मत न्याये माःगु आवश्यकता मदु ।

मत पिकाये न्ह्यः थ्व खिपाखें ग्याँस उत्पादन याइ । थौंकन्हय् अन न्हिं १२० किलो ग्याँस उत्पादन जुयाच्वंगु दु । थ्व ग्याँस फुक्क सिलिण्डरय् जायेकाः स्यांजाया बजारय् मीगु यानाच्वंगु दु । स्यांजायात थ्व ग्याँस दःसा गाः । वयां लिपा अन्तिमय् अर्गानिक साः नं उत्पादन यानाच्वंगु दु । थ्व साः स्थानीय किसानतय्त मीगु याइ ।

थुकथं छगू खा लहीगु फार्म थौंकन्हय् वैकल्पिक उर्जा उत्पादन याइगु मेगु कारखाना समेत जुयाच्वंगु दु । अन लहिनातःपिं खापाखें जक न्हिं ३० टन खि पिहां वइ । थ्व बाहेक फार्मं गामय् च्वंपिं मेपिं किसानतय्पाखें सा, म्येय्या समेत न्हिं १० टन खि न्याना काइ ।

थ्व फुक्क खिपाखें फार्मं ग्याँस, विजुली व साः उत्पादन यानाच्वंगु खः । सुरुइ २५ करोड तका लगानी यानाः चले याःगु थ्व फार्मयात लिपा वैकल्पिक उर्जा समेत उत्पादन याःगुलिं ४ करोड तका अनुदान नं वःगु खः ।