निजगढ विमानस्थल दयेकेगु तयारी

येँ (नेपालभाषा टाइम्स)÷ सर्वोच्च अदालतं दयेके मजिउ धकाः फैसला याःगु निजगढ विमानस्थल थौंकन्हय् दुने हे शिलान्यास यायेगु तयारी सरकारं याःगु दु । निजगढया आपालं जंगलया सिमा पाले माःगु जूगुलिं थ्व विमानस्थल दयेकल धाःसा पर्यावरणीय लिच्वः लाइ धासें सर्वोच्च अदालतं विमानस्थल अन दयेके मजिउ धकाः फैसला याःगु खः ।

छुं न्हि न्ह्यः जक सरकारं गठन याःगु छगू विज्ञ पुचलं निजगढ विमानस्थल वहे थासय् दयेकेगु पाय्छि खः धकाः रिपोर्ट बीवं सरकारं अन हानं विमानस्थल निर्माणया ज्या न्ह्याकेत्यंगु खः ।

विमानस्थल दयेकेत्यंगु थाय् नेकपा (एकीकृत समाजवादी) या अध्यक्ष माधव नेपालया चुनाव क्षेत्र नं जूगु कारणं वय्कः अन छुं नं हालतय् विमानस्थल दयेके हे माः धइगु पक्षय् दीगु खँ धाःगु दु । उकिं सर्वोच्च अदालतं विमानस्थल उगु थासय् दयेके मजिउ धकाः फैसला यायेवं दकलय् न्हापां हे नेता नेपालं उकिया आलोचना यानादीगु खः ।

आः विमानस्थल वहे थासय् दयेकूसां पाय्छि जुइ धइगु प्राविधिक रिपोर्ट वयेवं सत्ता गठबन्धनय् दुथ्याःगु दलतय्सं थौं–कन्हय्पाखे हे विमानस्थलया शिलान्यास समेत यायेगु तयारी याःगु खँ सीदुगु दु ।

सूत्रं धाःकथं सरकारं थ्व विमानस्थलया निर्माणयात आः चुनावय् लबः दइगु मुद्दाया रुपय् न्ह्यःने यंकेगु तयारी समेत यानाच्वंगु दु । उकिं निर्वाचन आयोगपाखें चुनाव सम्बन्धी आचार संहिता जारी जुइ न्ह्यः हे थुकिया उलेज्या याना छ्वयेगु तयारीपाखे सरकार लगे जूगु खँ नं धाःगु दु ।
म्हिगः चुनावया उम्मेदवारत क्वःछीगु लागिं च्वंगु गठबन्धनया बैठकय् तकं निजगढ विमानस्थल निर्माणया खँ पिहां वःगु खःसा वयां तुरुन्त हे लिपा नेता माधव नेपाल शिलान्यासया वातावरण दयेकेगु लागिं निजगढ झाःगु खः । वय्कःया लिसें प्रधानमन्त्री शेरबहादुर देउवाया जहान डा. आरजु देउवा नं निजगढ झाःगु खः ।

निजगढ विमानस्थल विरुद्ध सम्पदाविद् अधिवक्ता संजय अधिकारीं सर्वोच्च रिट तयादीगु खःसा उकिया हे फैसला यासें सर्वोच्च अदालतं विमानस्थल दयेके मजिउ धकाः निर्णय याःगु खः ।

सम्बन्धित बुखँ

LEAVE YOUR COMMENTS