राष्ट्रिय खेलकुदय् ब्वति काइपिं थिमिया कासामिपिंत सम्मान
थिमि(नेपालभाषा टाइम्स)÷विनायक शिक्षा निकेतन मध्यपुर थिमिपाखें पोखराय् जुइगु गुक्वःगु राष्ट्रिय खेलकुदय् ब्वति काइपिं मध्यपुर थिमिया कासामिपिंत भिंतुना देछा व सम्मान ज्याझ्वः याःगु दु । ब्वनेकुथिं वइगु असोज २७ निसें पोखराय् जुइगु कासाय् ब्वति काइपिं थिमिया कासामिपिंत प्रोत्साहनकथं ट्रायकशुट व टिसर्ट नं लःल्हाःगु खः ।
वंगु भदौ २९ गते राष्ट्रिय बाल दिवसया अवसर लाकाः कासामिपिंत सम्मान याःगु खः । ब्वनेकुथिपाखें गुक्वःगु राष्ट्रिय खेलकुदय् थिमिपाखें ब्वति काइपिं सुमन तामाङ, सुबि भासिमा, जेनिसा थापा व प्रकृति थापामगरयात सम्मान याःगु खः । सम्मानित सकलें जिम्न्याष्टिकया कासामिपिं खः ।
ज्याझ्वलय् नवासें मध्यपुर थिमि नगरपालिकाया प्रमुख सुरेन्द्र श्रेष्ठं नगरया कासामिपिंत प्रोत्साहन यायेमाःगु खँय् बः बियादिसें नगरया राष्ट्रिय कासामिपिनिगु पहिचान जुइकथं ठोस ज्याझ्वः हयेगु जुइ धयादिल ।
ब्वनेकुथिया प्रिन्सिपल सुरेन्द्रविक्रम प्रजापतिं थःपिनि हे विद्यार्थीत राष्ट्रिय खेलकुद कासाय् ब्वति कायेत्यंगुलिं गौरव महसुस जूगु धयादिल । लिसें वय्कलं ब्वनेगुया नापनापं कासालिसें मेमेगु अतिरिक्त क्रियाकलापय् इच्छा याइपिंत प्रोत्साहित याना वनेमाःगु खँय् बः बियादिसें कासाय् पदक त्याकेत सफल कासामिपिंत नगर पुरस्कार बीगु नं घोषणा यानादिल ।
ज्याझ्वलय् राष्ट्रिय बाल दिवसया लसताय् जूगु हस्तलेखन कासाय् उत्कृष्ट ११ व १२ गू तगिंया विद्यार्थीपिंत पुरस्कार नं लःल्हाःगु खः ।
LEAVE YOUR COMMENTS