भाषासेवी मोतिलाल शिल्पकार मंत

यल(नेपालभाषा टाइम्स)- नांजाःम्ह समाजसेवी, भाषासेवी लिसें व्यवसायी भाजु मोतिलाल शिल्पकार म्हिगः मंत । वय्कः ८९ दँ दुम्ह खः । वंगु ताः ई न्ह्यवंनिसें दम व निमोनिया ल्वचं कयाः उसाँय् मदयाच्वंम्ह वय्कः म्हिगः नख्खुया मेडिसिटी अस्पतालय् वासः याकुयाकुं मदुगु खः ।

अस्पतालय् मदुम्ह वय्कःया सीम्ह अन्तिम श्रद्धाञ्जलिया लागिं वय्कःया मानभवनस्थित थःगु हे छेँय् यंकूगु दु । थौं सुथय् तक अन हे अन्तिम श्रद्धाञ्जलि देछायेगु लिसें भिक्षु गुरुमांपिंपाखें पाठ याइगु ज्याझ्वः दु । वयांलि थौं हे शंखमुलय् अन्तिम संस्कार याइगु खँ सीदुगु दु ।

वय्कः थेरवादी बुद्ध धर्मय् नुगः क्वसाःम्ह उदार दाता नं खः । यलय् आपालं बौद्ध विहारत दयेकेगु लागिं वय्कलं आर्थिक ग्वाहालि यानादीगु दु । अथे हे नेपालभाषाया आपालं सफू व पत्रपत्रिका प्रकाशनयात नं वय्कलं ग्वाहालि यानादीगु दु । वय्कलं नेवाः पत्रकारतय्त बीगु ‘मोतिलाल सिरपाः’ नं नीस्वनादीगु दु । वय्कः नेपालभाषा मंकाः खलः यलया मानार्थ दुजः नं खः ।