ने. सं. ११४६ चाैलागा त्रयोदशी - थिमि बालकुमारी जात्रा

दाहालयात दुई तिहाइ बहुमत

येँ (नेपालभाषा टाइम्स)- प्रधानमन्त्री पुष्पकमल दाहालया सरकारयात प्रतिनिधिसभाया दुई तिहाइ स्वयां अप्वः बहुमत प्राप्त जूगु दु । संविधानया धारा ७६ (२) कथं प्रधानमन्त्री नियुक्त जूम्ह दाहालं म्हिगः धारा ७६ (४) या व्यवस्था कथं प्रतिनिधिसभाय् विश्वासया मत कयादीगु खः ।

दाहाल वंगु पुस १० गते न्हय्गू दल व स्वम्ह स्वतन्त्र यानाः १६९ म्ह सांसदया समर्थनय् प्रधानमन्त्री नियुक्त जूगु खः । म्हिगः धाःसा वय्कःयात २६८ म्ह सांसदं विश्वासया मत बिउगु खः । संसदया दकलय् तःधंगु दल नेपाली कांग्रेसं तकं दाहालयात विश्वासया मत बिउगु खः । उकिया लागिं कांग्रेसं पार्टी दुने ह्वीप जारी याःगु खः ।

प्रतिनिधिसभाय् २७५ म्ह दुजः दु । उकी मध्ये छम्ह सांसद निलम्बित अवस्थाय् दुसा राप्रपाया पशुपति शम्शेर जबरा बैठकया अध्यक्षता यानाच्वंगुलिं मतदानय् ब्वति मकाः । कांग्रेसया स्वम्ह सांसद किशोर सिंह राठौड, मनोरमा शेरचन व अम्बिका बस्नेत अनुपस्थित जूगु खः । उकिं म्हिगः मतदानय् २७० म्ह सांसदं ब्वति काःगु खः । थुकी मध्ये जनमोर्चाया चित्रबहादुर केसी व नेमकिपाया प्रेम सुवालं जक विपक्षय् मत बिउगु खः ।

प्रधानमन्त्री दाहालयात सत्ता गठबन्धनय् दुगु दलत एमालेया ७९, माओवादी केन्द्रया ३२, रास्वपाया २०, राप्रपाया १३, जसपाया १२, नेकपा (एस) या १०, जनमत पार्टीया ६, नागरिक उन्मुक्तिया ४, लोसपाया ४ व स्वम्ह स्वतन्त्र सांसदं विश्वासया मत बिउगु खः । उकथं हे कांग्रेसया ८५ म्ह सांसदं नं विश्वासया मत बिउगु खः ।

कांग्रेस संसदीय दलया बैठकय् दाहालयात मत बीगु खँय् फरक मत तःपिं महामन्त्रीद्वय गगन थापा, विश्वप्रसाद शर्मा व प्रदिप पौडलपिंसं नं मतदान जूबलय् धाःसा सरकारया समर्थनय् मत बिउगु खः ।
संविधानया धारा ७६ (४) उपधारा २ व ३ कथं नियुक्त जूम्ह प्रधानमन्त्रीं मनोनित जूगु सुइन्हुया दुने विश्वासया मत कायेमाःगु व्यवस्था दु ।

आः ५ गते सभामुख ल्यइगु
प्रधानमन्त्रीयात विश्वासया मत बीधुंकाः आः प्रतिनिधिसभा न्हूम्ह सभामुख ल्ययेगु प्रक्रियापाखे वनीगु जूगु दु । न्हूम्ह सभामुख ल्ययेगु निंतिं थ्वहे वइगु माघ ५ गते चुनाव जुइगु जूगु दु । थुकिया लागिं संघीय संसद सचिवालयं सभामुख ल्ययेगु नितिं माघ ३ गते सुचं पिथनीगु जूगु दु । प्रतिनिधिसभाया दुजःपिं मध्ये छम्हेसित सभामुख ल्यइगु व्यवस्था दु । प्रधानमन्त्री पुष्पकमल दाहालं विश्वासया मत कायेधुंकाः प्रतिनिधिसभाया बैठक माघ ५ गते च्वनेगु कथं म्हिगः बैठक क्वचाःगु खः । सभामुख सु जुइ धइगु खँ धाःसा आः तक सी मदुनि ।