एनसीआइएफएफय् चीहाः संकिपा इन्द्रायणी नामांकन

येँ- नेपाल कल्चर इन्टरनेशनल फिल्म फेस्टिभलय् नेपालभाषाया चीहाः संकिपा ‘इन्द्रायणी नामांकन जूगु दु । नेपाल कल्चार एण्ड फिल्म सेन्टरया ग्वसालय् जू वनाच्वंगु थुगु फेस्टिभल स्वंगूगू संस्करण खः ।

अन्तर्राष्ट्रियस्तरया थुगु फेस्टिभलय् विश्वया ५० गू स्वयां अप्वः देशं ब्वति कयाच्वंगु दु । ग्वसाः खलःया नायः सन्तोष सुवेदीयाकथं राष्ट्रिय व अन्तर्राष्ट्रिय भाय्या संकिपा नापं यानाः थुगुसी झिंप्यंगू विधाय् सछि व खुगू संकिपा दुथ्याःगु दु ।

कोरोना संक्रमणया दर अप्वया वनाच्वंगु स्थितियात ध्यानय् तयाः संक्रमण दर म्हो जुल धाःसा मनोनयनय् लाःपिंत छगू ज्याझ्वःया दथुइ दसिपौ लःल्हायेगु व फेस्टिभल वइगु डिसेम्बर १ निसें ३ तारिख दुने यायेगु ग्वसाः जुयाच्वंगु दु ।

पेजथ्री बाःछि पौया न्ह्यब्वया चीहाः संकिपा ‘इन्द्रायणी’ वेस्ट नेशनल वमेन्स विधा अन्तर्ग फेस्टिभलय् दुथ्याःगु खः । लुति अजिमा (इन्द्रायणी)या लोकबाखंया लिधंसाय् निर्माण जूगु थुगु चीहाः प्याखंया निर्देशक दर्शनवीर शाक्य खःसा निर्माता नरेशवीर शाक्य खः ।

संकिपाय् आराध्यलक्ष्मी खड्गी, देवकुमारी खड्गी, रुपेन श्रेष्ठ ‘थक्वाःमि’, अनुस्का महर्जन, रविना तुलाधर, रोसुमा महर्जन, सजना वज्राचार्य, राजु मानन्धर, नविन थेच्वमि लगायतं अभिनय यानादीगु प्याखंया छाँयाकनं व सम्पदान मनोजरत्न शाहीं यानादीगु खः ।

थीथी विधाय् यानाः १५ गू सिरपाः लःल्हाइगु फेस्टिभलय् नेपाःया च्यागू व विदेशया ७ गू संकिपायात सिरपाः लःल्हाइ ।