ने. सं. ११४४ कौलाथ्व पारू - नःलास्वनेगु

शरणार्थी काण्डय् गुम्हेसित कुना हे तइगु

येँ (नेपालभाषा टाइम्स)- उच्च अदालत यलं नक्कली भुटानी शरणार्थी प्रकरणय् पुलांम्ह मन्त्री टोपबहादुर रायमाझी सहित गुम्हेसित पुर्पक्षया नितिं कुनेगु येँ जिल्ला अदालतया आदेशयात सदर याःगु दु । न्यायाधीश जनक पाण्डे व प्रकाश खरेलया मंकाः इजलासं रायमाझी लगायत तत्कालीन गृहमन्त्री रामबहादुर थापाया सल्लाहकार इन्द्रजित राई, पुलांम्ह गृह सचिव टेकनारायण पाण्डे, केशव दुलाल, आङटावा शेर्पा, सानु भण्डारी, सन्देश शर्मा, गोविन्दकुमार चौधरी व सागर राईयात कुना तयेगु येँ जिल्ला अदालतया आदेशयात सदर याःगु खः ।

येँ जिल्ला अदालतं वंगु असार १ कुन्हु याःगु थुनछेकया आदेशयात बेरित जूगु धासें उगु आदेश बदर यानाः सामान्य तारिखय् मुद्दाया पुर्पक्ष यायेदयेमाः धकाः प्रतिवादीपाखें उच्च अदालतय् बिउगु निवेदनय् वंगु मंगलवाःनिसें नियमित सुनुवाइ यानाः म्हिगः फैसला न्यंकूगु खः ।

थुगु प्रकरणय् पुर्पक्षया झ्वलय् कुनातःपिं भुटानी शरणार्थी नेता टेकनाथ रिजाल, पुलांम्ह गृहमन्त्री बालकृष्ण खाणया स्वकीय सचिव नरेन्द्र केसी व पुलांम्ह मन्त्री रायमाझीया काय् सन्दिप रायमाझी धाःसा धरौटीइ त्वःतूगु दु ।

नक्कली शरणार्थी प्रकरणय् दुथ्याःम्ह पुलांम्ह गृहमन्त्री बालकृष्ण खाँणयात कयाः न्यायाधीशतय् दथुइ राय मिले मजूगु खः । निम्ह न्यायाधीशया राय मिले मजुइवं खाँण कुंका हे च्वनेमाःगु जूगु दु । आः मेम्ह न्यायाधीशया इजलासय् सुनुवाइ लिपा न्यायाधीशया राय कथं थ्व बारे निर्णय जुइगु खँ धाःगु दु ।