स्वतन्त्रतय् उम्मेदवारी घोषणा, येँ ८ नं. सुमन साय्मि दनिगु

येँ (नेपालभाषा टाइम्स)- वइगु निर्वाचनय् स्वतन्त्र रुपं उम्मेदवारी बीगु दावी याना वयाच्वंगु पुचलं मंकाः कथं उम्मेदवारी घोषणा याःगु दु । स्वतन्त्र व वैकल्पिक शक्ति अभियान न्ह्याकाच्वंपिंसं तुतां चिं कयाः निर्वाचनय् ब्वति कायेगु घोषणा याःगु दु ।

म्हिगः सतक विस्तार पीडित संघर्ष समितिया अध्यक्ष सुमन साय्मिया नेतृत्वय् स्वतन्त्र रुपं दनीपिं उम्मेदवारतय् नां घोषणा याःगु खः । म्हिगः सार्वजनिक जू कथं प्रतिनिधि सभाया निंतिं येँया २ नम्बर क्षेत्रं रोहन कार्की, ५ नम्बर क्षेत्रं मधुसुदन पाठक ‘सीते बा’, ८ नम्बर क्षेत्रं सुमन साय्मि व ९ नम्बर क्षेत्रं विद्या श्रेष्ठ महर्जन दनिगु जूगु दु ।

अथेहे ख्वप २ नम्बरं दरोस्तभ लोकेन्द्र, कास्की २ नं. सिरीष गुरुङ, रौतहट १ नं. राहुल मित्र, रुपन्देही ५ नं. भिष्म राना व उदयपुरं गजेन्द्र महतयात उम्मेदवार दयेकीगु जूगु दु । उकथं हे छुं छुं प्रदेशया उम्मेदवारतय् नां नं म्हिगः घोषणा याःगु दु । थ्वहे झ्वलय् अध्यक्ष साय्मिं बियादीगु जानकारी कथं स्वतन्त्र उम्मेदवारी बीत १ हजार २ सय स्वयां अप्वस्यां नां च्वकेधुंकूगु दु । नां च्वकेधुंकूपिनिगु क्राइटेरिया स्वयाः थप उम्मेदवार घोषणा यायेगु योजना दुगु खँ नं वय्कलं नेपालभाषा टाइम्सयात कनादीगु दु ।

देय्न्यंकं स्वतन्त्र उम्मेदवारी बीपिंसं थौंकन्हय् चुनाव चिंया ब्राण्ड जुयाच्वंगु तुतां चिं कायेगु जानकारी नं वय्कलं बियादीगु दु ।