अफगानिस्तानं ११८ म्ह नेपाःमि उद्धार
येँ – अफगानिस्तानय् तालिबानतय्सं कब्जा यायेवं अन ज्याय् वनाच्वंपिं ११८ म्ह नेपाःमि मंगलवाः येँय् लिथ्यंकः वःगु दु । तालिबानं काबुल कब्जा यायेधुंकाः नेपाः लिथ्यंपिं सकलें काबुलस्थित अमेरिकी राजदूतावासय् सुरक्षा गार्डया रुपय् ज्या यानाच्वंपिं जूगु खँ धाःगु दु । नेपाः लिथ्यनेवं उमित नेपाली सेनां सामाखुसिइ च्वंगु राधे राधे आइसोलेसनय् य ंकूगु खँ धाःगु दु ।
अमेरिकी दूतावासया सुरक्षा यानाच्वंपिं थुमित अमेरिकी सेनां काबुलं उद्धार यानाः कुबेत छ्वःगु खःसा अनं नेपाः लिहां वःगु खः । उपिं जजिरा एयरलाइन्सया चार्टड विमानपाखें नेपाः लिहां वःगु खः । नेपाः लिथ्यंपिं उमित येँ स्थित अमेरिकी दूतावासया कर्मचारीत वयाः लसकुस याःवःगु खः ।
नेपाःस्थित अमेरिकी दूतावासं ट्विट पाखें काबुलय् अेमरिकी मिशनय् ज्या याःपिं सहकर्मीतय्त लसकुस याये दुगु थःपिनिगु निंतिं सम्मानया विषय खः धासें वय्कःपिंसं यानादीगु सुरक्षा लगायतया सेवापाखें थःपिं कृतज्ञ दुगु खँ धयातःगु दु ।
परराष्ट्र मन्त्रालयं अफगानिस्तानं नेपाःमिपिंत उद्धार यायेगु ज्या सुरु जुइधुंकूगु धासें न्हापांखुसी ११८ म्ह नेपाःमि नेपाः थ्यंकःवःगु खँ धाःगु दु । मन्त्रालयं अफगानिस्तानय् थ्यंमथ्यं १४०० नेपाःमि दुगु जानकारी थःपिंके वःसां स्पष्ट रुपं गुलि दु धयागु सीमदुनि धाःगु दु ।
मन्त्रालयं अफगानिस्तानय् दुपिं नेपाःमितय् विवरण मुंकेत कन्सुलर सेवा विभागया वेबसाइट https://nepalconsular.gov.np/ संचालनय् दुगु व ह्वाट्सएप व भाइबरपाखें नं स्वापू तयेफइगु खँ धाःगु दु । थुकिया निंतिं मोबाइल नं. ९७७–९७४९३२६४५८ व ९७७–९७४९३२६४५९ य् स्वापू तयेफइ धाःगु दु ।
अमेरिकां उद्धार यानाः छ्वयाहःगु विमानय् १२७ म्ह दुगु खः, थुपिं मध्ये गुम्ह भारतीय नागरिक जूगु खँ धाःगु दु । उद्धार याःपिं १२७ म्ह मध्ये १२६ म्ह मिजंत खःसा छम्ह मिसा खः ।
LEAVE YOUR COMMENTS