यँयाःया व्यवस्थापनयात कयाः सरकार व सरोकारवाला दथुइ सहलह

येँ(नेपालभाषा टाइम्स)- नेपाल सरकारं यँयाः जात्राया व्यवस्थापनयात कयाः सरोकारवालालिसे सहलह ब्याकूगु दु । संस्कृति, पर्यटन तथा नागरिक उड्डयन मन्त्री जीवनराम श्रेष्ठं येँ देय्या सांस्कृतिक महत्वं जाःगु यँयाः नखःया व्यवस्थापनयात कयाः सरोकारवालालिसे सहलह ब्याकादीगु खः ।

उगु इलय् मन्त्री श्रेष्ठं यँयाः व्यवस्थापन समितिलिसें येँ महानगरपालिकाया जनप्रतिनिधि, स्थानीय प्रशासन, सुरक्षा निकाय, गुथि संस्थानलिसें यँयाःलिसे सम्बन्धित गुथिया प्रतिनिधिलिसें मेपिं सरोकारवालालिसे सहलह यानादीगु खः । उगु इलय् मन्त्री श्रेष्ठं यँयाःया सुरक्षाया विषयात कयाः विशेष चिउताः क्यनादीगु खःसा लिसें मेमेगु पक्षया व्यवस्थापनया विषययात कयाः नं सहलह यानादीगु खः ।

येँ देय्या छगू महत्वपूर्ण सांस्कृतिक नखःया रुपय् दयाच्वंगु यँयात अन्तर्राष्ट्रिय रुपय् हे म्हसीका बिया वनेमाःगु व थुकिया प्रचार प्रसार यायेमाःगु खँय् मन्त्री श्रेष्ठं बः बियादीगु दु । वय्कलं यँयाःयात अन्तर्राष्ट्रियस्तरय् म्हसीका बीगु व प्रचार प्रसार यायेत फत धाःसा थुकिं पर्यटन उद्योगया विकास जुइगु विश्वास प्वंकादीगु दु ।
राष्ट्रिपति, मन्त्री, विदेशी कूटनीतिक नियोगलिसें आम नगरवासीया सहभागिता दइगु राष्ट्रिय संस्कृतिया रुपय् दुगु यँयाः जात्रा स्वः वइपिं स्वदेशी व विदेशी सकसितं नं सहज जुइकथंया प्रबन्ध मिले यायेमाःगु खँय् नं वय्कलं बः बियादीगु दु ।

लिसें वय्कलं यँयाः प्रमुख आकर्षण श्रीकुमारि, श्री गणेश, श्री भैरवया रथयात्रालिसें जात्राया इलय् पिहां वइगु लाखे, पुलुकिसि, आकाश भैरव लगायतया झाँकीया नं व्यवस्थापन यायेमाःगु नापं ट्राफिक व्यवस्थापनय् नं विशेष ध्यान बीमाःगु खँ धयादीगु दु ।

नेपाःया आपालं मौलिक मूर्त अमूर्त संस्कृतियात जीवन्त याना तयेगु व विश्वय् थुकिया महत्व न्यंकेगु अवसरया रुपय् यँयाः जात्रायात कायेमाःगु वय्कःया धापू दु ।
उगु इलय् इन्द्रजात्रा व्यवस्थापन समितिपाखें यँयाः जात्रा सुथां लाकेत व आवश्यक व्यवस्थापनया निंतिं मन्त्री श्रेष्ठयात ज्ञापन पौ नं लःल्हाःगु खः । समितिया नायः गौतमरत्न शाक्यं मन्त्री श्रेष्ठयात ज्ञापन पौ लःल्हानादीगु खः ।

येँ महानगर प्रमुख बालेन्द्र शाहं सहलहया इलय् येँ महानगरपालिकां जात्राया व्यवस्थापनया निंतिं यानाच्वंगु ज्याया बारे जानकारी बियादिसें संस्कृति, सम्पदा क्षेत्रया संरक्षणया निंतिं स्वनिगःया स्वंगुलिं सहरया दथुइ सहकार्य जुइमाःगु खँ धयादीगु दु ।

थ्व हे झ्वलय् थुगुसी यँयाः नखः स्वयेत येँ महानगरपालिकां नीन्यागू नगर प्रमुखयात ब्वना पौ छ्वयेधुंकूगु दु । येँ महानगरं भारत, चीन, ल्हासा, अमेरिका, जापान, दक्षिण कोरिया, उत्तर कोरियाया थीथी नगर प्रमुखयात यँयाः जात्रा स्वयेत ब्वंगु खः ।

थनिं स्वदँ न्ह्यः विद्यासुन्दर शाक्य मेयर जुयाच्वनादीगु इलय् यँयाःयात अन्तर्राष्ट्रिय करण यायेगु ल्याखं येँ महानगरया भगिनी सम्बन्ध दुगु नगरया प्रमुखयात ब्वंगु खः ।