
येँ (नेपालभाषा टाइम्स)- प्रधानमन्त्री पुष्पकमल दाहाल प्रचण्डं नेपाल संवत्यात सरकारी दस्तावेजय् छ्यलेगु धकाः बियादीगु बचं पूवंकादीगु दु । म्हिगः गुरुङ समुदायं न्यायेकीगु तमु ल्होसार नखःया लसताय् वय्कलं जारी यानादीगु भिंतुना सन्देशय् नेपाल संवत्या तिथि नं छ्यलादीगु खः ।
वय्कलं जारी यानादीगु भिंतुना सन्देशया क्वय्पाखे विक्रम संवत्या मिति क्वसं नेपाल संवत्या तिथि ‘नेपाल संवत् ११४४ थिंल्लाथ्व ४’ धकाः नं न्ह्यथनातःगु खः । प्रम प्रचण्डं नेपाल संवत्यात सरकारी दस्तावेजय् नं छ्यला यंकेगु जुइ धकाः बियादीगु सार्वजनिक अभिव्यक्ति लिपा नेपाल संवत् छ्यलाः पिहां वःगु थ्वहे न्हापांगु सरकारी दस्तावेज खः । ने.सं ११४४ न्हूदँया लसताय् थःत नापलाः वःपिं न्हूदँ समारोह समितिया दुजःपिंत वय्कलं नेपाल संवत् सरकारी ज्याखँय् छ्यलेगु कुतः याये धकाः बचं बियादीगु खः ।
वयां लिपा न्हूदँया छन्हु न्ह्यः लक्ष्मीपुजा कुन्हु च्वंगु मन्त्रिपरिषद्या बैठकं सरकारी दस्तावेजय् नेपाल संवत् नं छ्यला वनेग् धकाः निर्णय याःगु खः । भिंतुना सन्देशय् नेपाल संवत् छ्यलेगु प्रमया थ्व ज्यायात सकस्यां च्वछाःगु दु ।
LEAVE YOUR COMMENTS