गन गन दइ सार्वजनिक चःबि ?
येँ – सार्वजनिक सवारी साधनं यात्रु थकाइगु व क्वकाइगु थासय् सार्वजनिक चःबि दयेकेगु निंतिं येँ महानगरपालिकां थाय् पहिचान याःगु दु । मनपा सार्वजनिक निजी साझेदारी एकाइया प्रमुख धु्रव काफ्लेया कथं मनूत वये–वने व सामान न्याये–मी अप्वः जुइगु थासय् शौचालय दयेकेगु तयारी जुयाच्वंगु दु ।
आः तक बबरमहलया नेपाल कला परिषद् न्ह्यःने, थापाथली बसस्टप, बानेश्वर देगः, कोटेश्वर चोकया पूर्वपाखे, टेकुया नेशनल ट्रेडिङ न्ह्यःने, कलंकी मेट्रो हल जःखः, बालाजु, बाइसधारा, सीतापाइला बसस्टप, माछापोखरीइ सार्वजनिक चःबि दयेकेत थाय् मालेधुंकूगु दु ।
अथेहे हे गौशाला, तीनकुने, त्रिपुरेश्वर, लँुहिति, एनएसी, न्हूसतक, हनुमानध्वाखा, जमः, लैनचौर, सोह्रखुट्टे, बल्खु व कुलेश्वरय् नं न्हापांगु चरणय् चःबि दयेकेमाःगु थाय् कथं सिफारिस जूगु दु । वंगु माघ ६ गते नीस्वंगु सार्वजनिक शौचालय निर्माण सम्बन्धी कार्यदलं उगु थाय् ल्यःगु खः ।
थौंकन्हय् येँ मनपा दुने ५८ गू सार्वजनिक चःबि सञ्चालन जुयाच्वंगु दु । उगु चःबि मध्ये नं २८ गू जक छ्यले जिउगु अवस्था दुगु खँ येँमनपां धाःगु दु । मेगु ३० गू मर्मत यानाः जक छ्यले फइगु अवस्थाय् दु ।
आः दुगु गुलिखे सार्वजनिक चःबिइ लः, साब्वंया व्यवस्था मदुगु, अपाङमैत्री मजूगु, माक्व जःया व्यवस्था मजूगु, मिसातय्त स्यानिटरी प्याड हिलेत व वांछ्वयेत थाय् मदुगुलिं आः न्हू दयेकीगु स्मार्ट चःबिइ थज्याःगु फुक्कं व्यवस्था जुइगु खँ धाःगु दु ।
येँमनपां निदँया दुने ४१ गू थासय् स्मार्ट सार्वजनिक चःबि दयेकेगु आज्जु तयातःगु दु ।
LEAVE YOUR COMMENTS