बाल साइबर सुरक्षा सम्बन्धी श्वेतपत्र जारी

येँ- चाइल्डसेफनेट व युनिसेफ नेपालं मस्त व ल्याय्म्हतय् अनलाइन सुरक्षा बारे छगू श्वेतपत्र जारी याःगु दु । चाइल्डसेफनेटं उगु श्वेतपत्र युनिसेफया ग्वाहालिइ मस्त व ल्याय्म्हतय् निंतिं इन्टरनेट प्रयोगय् सुरक्षित यायेगु ल्याखं हःगु खः ।

श्वेतपत्रय् मस्त व ल्याय्म्हतय् अनलाइन सुरक्षा बारे नीति, योजना, सहयोग संयन्त्र व कार्यान्वयन सम्बन्धी म्होतिया बारे समीक्षा यानातःगु दुसा मस्त व ल्यायम्हतय् इन्टरनेट प्रयोगलिसें इमित कयाः जुइगु अनलाइन जोखिम, दुव्र्यवहार व शोषण बारे विस्तृत जानकारी दुथ्याका तःगु दु ।वंगु छगू दशकया दुने नेपालय् इन्टरनेट प्रयोगकर्ताया ल्याखय् तीव्र रुपं वृद्धि जूगु दुसा नेपाल दूरसंचार प्राधिकरणया कथं थौंतकया दुने ८०.०७ प्रतिशत नेपाःमिया इन्टरनेटय् पहुँच दयेधुंकूगु दु । जबकि छगू दशक न्ह्यःतक थ्व ल्याः धइगु २.६५ प्रतिशतय् जक सीमित जुयाच्वंगु खः ।

निगुलिं संस्थां मंकाःकथं याःगु छगू सर्वेक्षणकथं नेपालय् कोभिड–१९या प्रकोप लिपा प्रत्येक प्यम्ह नेपाःमध्ये छम्ह मचा वा ल्याय्म्हं न्हिछिया १० घौ स्वयां अप्वः ई इन्टरनेट चले यायेगु यानाच्वंगु सीदुगु दु । चाइल्डसेफनेटया संस्थापक अध्यक्ष अनिल रघुवंशीं भर्चुअल माध्यमं श्वेतपत्र जारी यानादिसें इन्टरनेटया पुहँच व प्रयोगकर्ताया ल्याः अप्वःसां नं थुकिया सुरक्षाबारे जनस्तरय् अझ नं चेतनाया कमि दुगु खँ धयादीगु दु ।

थुकिया परिणामस्वरुप मस्त व ल्याय्म्हत अनलाइन यौन दुव्र्यवहार, अनलाइन यौन शोषण, साइब बुलि·, साइबर ग्रुमिङ व साइबर फिसि· थेंज्याःगु अनलाइन जोखिमय् लानाच्वंगु वय्कलं धयादिल । युनिसेफ नेपालया बाल संरक्षण प्रमुख इनाह फाटुमाटा कालोगां श्वेतपत्रं नेपालय् मस्त व ल्याय्म्ह पुस्ताया निंतिं अनलाइन सुरक्षाय् दयाच्वंगु ज्ञानया कमियात पूर्ति यायेत ग्वाहालि जुइगु अपेक्षा यानागु खँ धयादीगु दु ।

श्वेतपत्रया मस्यौदाकारलिसें मानवअधिकार व कानून विज्ञ कपिल अर्यालं नेपालय् साइबल अपराध सम्बन्धी सकतां कथंया केसय् विद्युतीय कारोबार ऐन–२०६३ प्रयोग जुयाच्वंगु जानकारी बियादिल । काठमाडौं ल स्कुलया प्राध्यापक तकं जुयादीम्ह वय्कलं येँ जिल्ला अदालतय् जक ऐनकथं दर्ता जूगु मुद्दाया सुनुवाईया निंतिं क्वःछिनातःगुलिं स्वनिगः पिनेया पीडिततय् समस्या जुयाच्वंगु धयादिल ।