गुपुन्हि कुन्हु रात्रीकालीन सम्पदा यात्रा
किपू (नेपालभाषा टाइम्स)- वइगु गुंलाथ्व पुन्हि (साउन २७) कुन्हु रात्रीकालीन सम्पदा यात्रा याइगु जूगु दु । किपूया बहाः चाःहिलेगु पम्परायात तिबः बीकथं गुंपुन्हिकुन्हु रात्रीकालीन सम्पदा यात्रा यायेत्यंगु खः ।
जोशी ननि हेरिटेज होम्स एण्ड रेष्टुरेन्टया ग्वसालय् उकुन्हु रात्रीकालीन सम्पदा यात्रा यायेत्यंगु खः । वंगु विहीवाः होम्सं ग्वसाः ग्वःगु पत्रकार सम्मेलनय् गुंपुन्हिकुन्हु किपुलिइ जुइगु बहाः चाःहिलेगु परम्परायात तिबः बीगु ल्याखं रात्रीकालीन सम्पदा यात्रा यायेत्यनागु जानकारी बिउगु खः ।
किपुलिइ परम्परागत रुपं सापारुकुन्हु बहाः चाःहिलेगु परम्परा दया वयाच्वंगु दुसा थुगुसी उगु परम्परालिसें पर्यटन प्रवद्र्धन नं यायेगु ल्याखं उगु सम्पदा यात्रा यायेत्यनागु पत्रकार सम्मेलनय् जानकारी बिउगु दु ।
होम्सया सल्लाहकार सघरत्न वज्राचार्यं किपू देय्या ऐतिहासिक म्हसीका जुयाच्वंगु चिलंच्व विहार, जगतपाल महाविहारलिसें थीथी बहाः बहीया म्हसीका बीगु, किपूया सांस्कृतिक, धार्मिक, ऐतिहासिक नापं नखःचखःया विशेषता, नापं रात्रीकालीन सम्पदा यात्राया विशेषता बारे नं जानकारी बीगु खँ कनादीगु दु ।
कोरोनां पर्यटन ख्यलय् लाकूगु लिच्वःयात पुनरुत्थान यायेगु ल्याखं उगु सम्पदा यात्रा यायेत्यनागु जानकारी बिसें किपू १० वडाय् लाःगु जोशी ननि, सिंहद्वाः, चिलन्चो लगायतया थासय् संकिपाया छाँयाकन यानाः उगु थाय्या प्रचार प्रसार यायेत नं इनाप याःगु दु ।
पर्यटन प्रवद्र्धनया निंतिं हे थीथीकथंया प्याकेज हयेत्यनागु होम्सया नायः शरद मंगल जोशीं पत्रकार सम्मेलनय् कनादिल । वय्कलं गुंपुन्हिकुन्हु बहनि जुइगु रात्रीकालीन सम्पदा यात्राय् ब्वति कायेत न्यासः तका वंगु टिकटया व्यवस्था यानागु जानकारी बियादिसें ब्यलिया नं व्यवस्था दुगु खँ कनादिल ।
बहनिसिया ९ ताःइलंनिसें न्ह्याइगु सम्पदा यात्रा स्वघौतक न्ह्याइगु व थ्व अवधिइ ५३ गू थासय् चाःहिलेगु पत्रकार सम्मेलनय् जानकारी बिउगु दु ।
LEAVE YOUR COMMENTS