ने. सं. ११४४ कौलाथ्व पारू - नःलास्वनेगु

बृहत साहित्य सम्मेलन व हना ज्याझ्वः

यल – नेपालमण्डल साहित्य प्रतिष्ठानया ग्वसालय् वंगु शनिवाः छगू वृहत साहित्यिक सम्मेलन नापं हनाज्याझ्वः जुल । प्रतिष्ठानया नायः बद्री बेदनाया सभापतित्वय् जूगु ज्याझ्वलय् नेपालभाषाया नांजाःम्ह म्येँ हालामि जगमोहन वामि मूपाहांकथं झायादीगु खः ।

साहित्य सम्मेलनय् नेपालभाषाया न्हूपिं व पुलांपिं यानाः पीम्ह स्वयां अप्वः साहित्यकारतय्सं थःथःगु रचना पाठ यानादीगु खः । ज्याझ्वलय् राजभाई जकःमि, मंगलनारायण जोशी, श्याम ‘आशा’ कायस्थ, माणिक उराय, बिमलप्रभा वज्राचार्य, कृष्ण साय्मि, प्रेमकृष्ण ताम्राकार, बुद्ध नेवाः, रमेश मानन्धर, ज्ञानीराजा मानन्धर, अमृतमान जः, दशराज शाक्य, अर्जुन नेपाःमि, रेणु श्रेष्ठ, राकेश महर्जन, कविन्द्रलाल प्रधान, तीर्थरत्न शाक्य, इन्द्रमान महर्जन, सुवर्ण महर्जन, बसन्त नकःमि लगायतं थःथःगु साहित्य रचना पाठ यानादीगु खः ।

उगु हे ज्याझ्वलय् न्याम्ह थीथी ख्यःया व्यक्तित्वपिंत थीथी हनापाखें नं सम्मान याःगु खः । सुधिर ख्वबियात मेनका हना, गोविन्दमान श्रेष्ठयात निर्मला लुमन्ति हना, डा. रिना तुलाधर बनियायात डा. कौशल्या लुमन्ति हना, श्याम तमोट (भोजपुर)यात संगीतरत्न लुमन्ति हना व सुर हना–११३८ पत्रकारिता राजेन्द्र रंजितयात लःल्हाःगु खः । वय्कःपिंत म्हतिं न्याद्वः तका दां दातापाखें लःल्हाःगु खःसा मूपाहांपाखें दोसल्लां न्ययेकादीगु खः ।

वाङ्मय शताब्दी पुरुष सत्यमोहन जोशी, यज्ञरत्न धाख्वा, ऋषि श्रेष्ठ पाहांकथं झायादीगु ज्याझ्वलय् थःगु नुगःखँ तयेगु झ्वलय् वल्र्ड नेवाः अर्गनाइजेसनया नायः सिजन श्रेष्ठं विश्वन्यंकंया नेवाःतय्त दँय्दसं छगू हे थासय् मुंकेगु ल्याखं विश्व नेवाः दिवस हनेगु क्वःछिनागु जानकारी बियादिल । लिसें वय्कलं झी नेवाःतय् छुं नं नखःचखः मलाइगु ईयात ध्यानय् तयाः मार्च महिनाया दकलय् लिपांगु शनिवाः हलिं नेवाः दिवस न्यायेकेगु क्वछिनागु खः धयादिल ।

नेवाःतय्त न्हंका छ्वयेगु उद्देश्यं विकासया नामय् छगू छगू यायां थीथी योजनात हयाच्वंगु धासें उकिया निंतिं स्वनिगःलिसें विश्वन्यंकंया नेवाःत सकलें छधीछप्पँ जुयाः आन्दोलनय् कुहां वयेमाःगु हथाय् जुइधुंकूगु धयादिल ।

ज्याझ्वलय् नांजाःम्ह म्येँ हालामि जुजुकाजी रंजित व कलाकार महन्त मल्लं म्येँ हालाः न्यंकादीगु खः ।