विप्लव विरुद्ध पूर्जीयात विरोध

येँ (नेपालभाषा टाइम्स)- नेत्र विक्रम चन्द (विप्लव) यात ज्वनेगु लागिं सर्वोच्च अदालतं पूर्जी जारी यायेवं थीथी राजनीतिक पार्टीतय्सं उकिया विरोध याःगु दु ।
प्रमुख प्रतिपक्षी नेकपा एमाले व सत्तारुढ दल माओवादी केन्द्रं उगु पक्राउ पुर्जी लित कायेत माग याःगु दु । म्हिगः सदनय् न्ववासें एमालेया प्रमुख सचेतक विशाल भट्टराईं चन्द पुचःलिसे तत्कालीन केपी शर्मा ओली सरकारं याःगु सम्झौता कार्यान्वयन यायेत नं माग यानादीगु दु ।

वय्कलं यदि शान्तिप्रक्रियाय् वयेधुंकूपिं चन्द लगायतया नेतातय्त पक्राउ पुर्जी जारी याःगु खःसा सरकारं तत्काल हे अज्याःगु पक्राउ पुर्जीं लित कायेमाः धकाः माग यानादिल ।

हिंसापूर्ण आन्दोलन यानाच्वंगु पुचःयात पुलांगु सरकारं वार्तापाखें मूलधारय् हयेधुंकाः जनतां शान्तिपूर्ण ढंगं म्वाये खनीगु जुल धकाः आशा यानाच्वंगु इलय् थज्याःगु पूर्जी जारी जुइगु दुःखपूर्ण खँ खः धासें वय्कलं सरकारयात कारवाही यायेगु पलाःपाखें लिचिलेत इनाप यानादिल ।

उकथं हे नेकपा माओवादीया नेता नारायणकाजी श्रेष्ठं विप्लव पुचःयात जारी याःगु पक्राउ पुर्जी खारेज यायेत माग यानादीगु दु । म्हिगः सामाजिक सञ्जालय् थःगु बिचाः तसें श्रेष्ठं धयादीगु दु, ‘पक्राउ पुर्जी बारे नियमित अदालती प्रक्रिया धकाः सरकार लिचिले मजिउ, थुकियात खारेज यायेमाः ।

उकथं हे माओवादी केन्द्रया सांसद अमनलाल मोदीं चन्द पुचःया नेतातय्त पक्राउ पुर्जी जारी याःगु खँय् आपत्ति प्वंकुसें सरकारं सहमतिया आधारय् जेलय् दुपिं विप्लव पुचःया नेता कार्यकर्तायात त्वःतेगु पलेसा अःखतं पक्राउ पुर्जी जारी याःगुली असन्तुष्टि प्वंकादीगु खः ।

म्हिगः संसदय् न्ववासें सांसद मोदीं धयादिल, ‘नेकपा विप्लव पुचःलिसे सरकारं स्वंगू बुँदे सहमति याःगु दु, उकिया कार्यान्वयन यायेगु पलेसा धरपकड, वारेन्ट जारी यायेगु थ्व अदालतया खँ खः, तर सरकारलिसे वार्ता यायेधुंकाः सरकारं पहलकदमी कायेमाः, जेलय् दुपिं बन्दीत त्वःतेमाः ।’

सांसद मोदीं थारु आन्दोलनया झ्वलय् ज्वनातःपिं नेता कार्यकर्तायात त्वःतेमाःगु माग नं यानादिल । अधिकार फ्वनीबलय् थारु, मधेशी, दलित, जनजाति व मिसातय्त राज्यं दमन याना वयाच्वंगु द्वपं नं वय्कलं बियादिल ।

म्हिगः अदालतपाखें आकाझाकां विप्लव पुचःया नेता नेक्रविक्रम चन्द लगायतया पुचःयात ज्वनेगु पूर्जी यायेवं म्हिगः हे विप्लव पुचलं उकिया विरोध यासें थ्व पूर्जी खारेज मयात धाःसा थुकिया बांलाइ मखु धकाः ख्याच्वः बीधुंकूगु दु ।

सम्बन्धित बुखँ

LEAVE YOUR COMMENTS