हिरोतय् हिलावंगु ख्वाःपाः

कलिउड धकाः धयातःगु खस नेपाली फिल्मया चर्चा यायेबलय् छगू इलय् थ्व ख्यलय् खस आर्य मूलया हिरोतय्गु जक नां वइगु खः । खय्त ला नेपाःया न्हापांगु फिल्म “आमा”या हिरो शिवशंकर मानन्धर नेवाः खः, अथे जूसां लिपा वना फिल्मय् हिरो जुइपिनिगु ख्वालय् खस आर्य मूलया बाहुल्यता जुयावन । “मनको बाँध”या शल्यान के.सी.निसें कयाः भुवन के.सी., राजेश हमाल, निखिल उप्रेती, विराज भट्ट, आर्यन सिग्देलतकया यात्राय् आपालं ख्वाःपाः खस आर्य मूलया हे खनेदत ।

आर्यन सिग्देलया छगू तसकं बय्बय् जूगु फिल्म “मेरो एउटा साथी छ” फिल्मय् मंगोल ख्वाःया दयाहाङ्ग राईयात छगू तसकं हे चिहाकःगु जक रोल बियातःगु खः । आर्यन सिग्देलया हे मेगु छगू “के यो माया हो” फिल्मय् सौगात मल्लयात साइड रोलजक बियातःगु दु । थ्व छगू उगु इलय् खस आर्य ख्वाःयात मेन रोल बिइगु व मंगोल ख्वाःयात साइड रोल बिइगु खँया दसु खः ।

अज्याःगु इलय् शिव श्रेष्ठ व श्रीकृष्ण श्रेष्ठ थेंज्याःपिं नेवाःत हिरो मजूगु मखु । लोकंमह्वाःगु नं मखु, तर मंगोल ख्वाःवःपिं मेपिंसं उलि थाय् काये मफु । विजय लामा उकीया हे दसु खः । आः अथे मजुइ धुंकल । आः वया मंगोल ख्वाःया हिरो नं लोकंह्वाःम्ह हिरो जुइफु धइगु दसु आपालं खनेदया वःगु दु । विशेष यानाः थौकन्हय् दकलेसकले लोकंह्वाःपिं निम्ह हिरोतय् नां कायेबलय् छम्ह दयाहाङ्ग राईया नां न्ह्यःने लानाच्वंगु दुसा मेम्ह अनमोल के.सी.या नां दु ।

खस आर्य ख्वाःया अनमोल के.सी.यात ययेकीपिं ल्यासे–ल्याय्म्ह पुस्ता खःसा दयाहाङ्ग राईयात दक्वः वर्गं ययेकावया च्वंगु खनेदु । थ्व दँबदँया खँल्हायेगु खःसा दयाहाङ्ग राईयात फिल्म लोकंह्वाइगुया ग्यारेन्टिया रुपय् कयाहःगु दु । वि.सं.२०७४ दुने दयाहाङ्ग राईया पिदंगु फिल्मय् “घामपानी” व “कान्छि” हिट जुलसा “मि. झोले” नं बांलाक्क हे बनेज्या यायेत ताःलात । देशं पिने ला झन दयाहाङ्ग राई आपालं लोकंह्वाः ।

थुकथं स्वयेबलय् कलिउडय् हिरोतयय् ख्वाःपाः हिलावंगु बांलाक हे खनेदु । छगू इलय् आर्यनया फिल्मय् बःचाहाकःगु रोलय् जक कयेकुंका च्वनेमाःम्ह दयाहाङ्ग थौंया तसकं लोकंह्वाःम्ह हिरोया रुपय् न्ह्यःने लाःवःगु दु । उलिजक मखसे “लोफर” नांयागु छगू फिल्मय् ला दयाहाङ्ग राई मेन रोल व आर्यन सिग्देल साइड रोलय् तक लाःगु नं खनेदत । थौंकन्हय् ला आर्यन सिग्देलया ल्हातिइ फिल्मय् मंत धाःसां पाइमखु ।

अथेहे तुं “के यो माया हो” फिल्मय् साइड रोलजक म्हितूम्ह सौगात मल्ल नं थौं छम्ह लोकंह्वाःम्ह हिरोया रुपय् यक्वः हे न्ह्यःने लानाच्वंगु दु । दयाहाङ्ग राई व सौगात मल्लं आपालं फिल्मय् नापं नं म्हितूगु दु । “लुट” नांयागु फिल्मंनिसें इमिगु टिम बने जूगु खःसा लिपा वनाः “लुट २” तकया दुने इपिं निम्हेसिनं नापं आपालं फिल्म म्हितल । सौगात मल्लया न्हूगु फिल्म मध्ये “फाटेको जुत्ता” नं हिट हे जूगु फिल्म खः ।

थुकथं हिरोया ख्वाःजक मखु हिरोया परिभाषातकं हिलावंगु दु । न्हापा जूसा हिरो धइम्ह संसारय् हे दकलय् बांलाःम्ह मनूया रुपय् क्यनीगु खःसा वयात संसारय् हे बल्लाःम्ह यानाः क्यनीगु खः । तर आः वयाः हिरो धइम्ह अज्याःम्ह मखसे समाजया हे छम्ह पात्रया रुपय् क्यनीगु चलन अप्वया वःगु दु । छम्ह सामान्य मनुखं जीवन हनेत छु यायेमाः फिल्मया पात्रं व हे यायेमाः धकाः फिल्मय् क्यनेगु चलन अप्वःया वःगु दु ।

हिरोयात हिरोकथं मखसे फिल्मया मेन पात्रया रुपय्जक क्यनेगु चलन चले जुया वःगु दु । थज्याःगु दसु आपालं दु । “पशुपतिप्रसाद” नांयागु फिल्मयात थुकिया दसु कथं कायेमाः । थ्व फिल्मया मेन पात्रं छम्ह सामान्य मनुखं यायेथें हे जीवनय् संघर्ष याइ । संघर्ष यायां हे सामान्य मनू थें सिना वनी । छम्ह हिरो थें दक्वः खलपात्रयात स्यानाः वा त्याकाः हिरो जुयाः क्यनीमखु ।

थौंकन्हय्या फिल्मय् पशुपतिप्रसाद थेंज्याःपिं झीगु जीवनय् खनेदइपिं पात्रतय्गु उपस्थिति अप्वया वःगु दु । अले अज्याःगु पात्रय् म्हितीपिनिगु ख्वाः नं पाना वःगु दु । वंगु छवाः निवाः न्ह्यःतिनि क्यनेज्या जूगु “तिमिसँग” नांयागु फिल्मय् निम्ह मेन मिजं पात्र न्ह्यब्वया तःगु दु । उकी मध्ये छम्ह आर्य खस ख्वाःवःम्ह आकाश श्रेष्ठ खःसा तराई मधेशया पात्रया प्रतिनिधि कथं नाजीर हुसेन तयातःगु दु ।

नाजीर हुसेनं थ्व सिबें न्ह्यः “होस्टेल रिटन्र्स” य् नं मधेशी पात्रया रुपय् थःत न्ह्यब्वये धुंकूगु खःसा “वीर विक्रम” लगायत आपालं फिल्मय् बिस्कंबिस्कं भुमिकाय् थःत न्ह्यब्वयेधुंकूगु दु ।पशुपतिप्रसाद फिल्मय् पशुपतिप्रसाद विरुद्धय् खलपात्र जुयाः म्हितूम्ह विपिन कार्की नं थौंया इलय् छगू बिस्कं हे छाप त्वःतेत ताःलाःम्ह कलाकार खः । आपालं फिल्मय् बिस्कंबिस्कं कथं रोल म्हिताः थःत छम्ह धिसिलाःम्ह कलाकार धकाः पुष्टि यानाः क्यंम्ह विपिन कार्कीयात “जात्रा” फिल्मय् म्हितूगु मेन रोलं छम्ह लोकंह्वाःम्ह कलाकारया रुपय् न्ह्यःने थने हलसा “नाका” वयागु न्हूगु फिल्म खः ।

न्हापा फिल्मय् न्हिइकीम्ह पात्र धइम्ह जोकर वा कमेडियन धकाः धाइगु खःसा थज्याःपिं कमेडी कलाकारत नं फिल्मया मेन पात्र जुइफु धइगु जक मखसे लोकंह्वाःपिं कलाकारया रुपय् न्ह्यःने नं लाना च्वंगु दु । थज्याःगु ज्याया शुरुवात टेलिभिजनय् “तीतोसत्य” नांयागु लोकंह्वाःगु सिरियल दयेकूपिं दिपकराज गिरी व दिपाश्री निरौलाया पुचलं यानाक्यंगु खः । इमिसं दयेकूगु न्हापांगु फिल्म “छ एकान छ” खः ।

थ्व फिल्मय् दिपकराज गिरी थः नापनापं माग्ने बुढा धकाः लोकंह्वाःम्ह केदार घिमिरे, धुर्मुस धकाः लोकंह्वाम्ह सिताराम कट्टेल , मुखाँ हानु जस्तो धाइम्ह शिवहरी पौड्याल थेंज्याःपिं कमेडीया ख्यलय् नांजाःपिं वा लोकंह्वाःपिं कलाकारपिंत मेन रोल बिल । थ्व फिल्म पिहां वये न्ह्यःतक आपासिनं टिभीइ सितिं स्वयेदुपिंत ध्यबा पुलाः सुनां स्वः वइ धका धयाच्वंगु खः । तर फिल्म पिहां वःबलय् हिट जुल ।

थ्व पुचलं दयेकूगु ‘वडा नं. छ’ नं हिट हे जुलसा ‘छक्का पञ्जा’ व ‘छक्का पञ्जा २’ ला नेपाःया फिल्म इतिहासय् आःतकया दुने दकलेसकले अप्वः दां कमे याःगु फिल्मया रेकर्ड तयेत ताःलात । आः वया फिल्मय् कमेडी रोल म्हितीपिं कलाकारयात नं मेन रोलय् न्ह्यब्वयेगु चलन अप्वःया वःगु दु । नकतिनि हे जक “सय्कडा दस” नांयागु छगू फिल्मय् हास्यव्यंग्य ख्यलय् तसकं हे नांजाःम्ह मनोज गजुरेलयात मेन रोलय् न्ह्यब्वइगु खँ पिहां वःगु दु ।

न्हापान्हापा मह जोडीया रुपय् साप हे लोकंह्वाःपिं मदनकृष्ण श्रेष्ठ व हरिवंश आचार्यं नापं म्हितूगु फिल्म उलि लोकंह्वाःगु खनेमदु । तर आः वय्कःपिं निम्ह नापं दिपकराज गिरीया मेन रोल दुगु “शत्रु गते” तसकं हे लोकंह्वाना च्वंगु दु । थुकथं दिपकराज गिरीं मेन रोल म्हितातःगु छ एकान छ, छक्का पञ्जा, छक्का पञ्जा २ व शत्रुगते नं हिट जूबले दिपकराज गिरी नं सेलेबल स्टारया रुपय् न्ह्यःने लाःवःगु दु ।

अले फिल्मय् मेन रोल म्हितीम्ह हिरो मखसे मेन लीड कलाकार खः धइगु खँया दसु कथं न्ह्यःने वःगु दु । थौंकन्हय्या फिल्मय् मेन रोलय् खनेदयेकः वयाच्वंपिं कलाकारय् कामेश्वर झा, रविन्द्र झा, अर्पण थापा व रबिन्द्रमान सिंह बानियापिनिगु नां नं न्ह्यथनेमाःगु छुंछुं नां मध्ये लाः । रबिन्द्रमान सिंह बानिया व रबिन्द्र झा ला “जात्रा” नांयागु फिल्मय् विपिन कार्कीलिसे हे मेनरोलय् म्हितूपिं कलाकार खःसा थ्व फिल्म छगू तसकं लोकंह्वाःगु फिल्म खः धका थन धया च्वनेमाली मखु जुइ ।

थुकथं स्वयेबलय् सीदुकी कलिउडय् हिरोया ख्वाःपाः पाना वःगु मखसे फिल्मय् मेनरोलयात न्ह्यब्वइगु दृष्टिकोण नं पाना वःगु दु । थुकिं यानाः फिल्मय् मेन रोल म्हितीपिनिगु ख्वाःपाः नं पाना वःगु खःसा आः न्हापा थें खस आर्य जक मखसे मंगोल वा मधेशी पात्र नं मेन पात्र जुया फिल्मय् खनेदयेक वःगु दु ।