महानगरया लागिं बिस्कं कानूनया माग

येँ (नेपालभाषा टाइम्स)- पोखराय् निन्हुयंकं जूगु महानगरया मेयर सम्मेलनं महानगरपालिकाया नितिं बिस्कं कानून दयेकेत माःगु याःगु दु । म्हिगः न्ह्यय्गू बुँदाया घोषणापत्र जारी यासें उगु माग याःगु खः । महानगरया फोहोर व्यवस्थापन यायेगुली संघीय सरकारं ग्वाहालि मयाःगु द्वपं नं घोषणा पतिइ बियातःगु दु ।

देय्या खुगू महानगरपालिकाया मेयरं स्थानीय सरकार सञ्चालन ऐन, २०७४ लगायत थीथी संघीय कानुनया परिमार्जन यासें महानगरपालिकाया नितिं बिस्कं ऐन दयेकेत सरकारयात माग याःगु खः । पोखराय् जूगु भेलाय् मेयरपिंसं तःधंगु व चीधंगु पालिका छगू हे कानुनं न्ह्यायेमाःगुलिं महानगरपालिकाया नितिं बिस्कं ऐन आवश्यक जूगु खँ धाःगु खः ।

घोषणा पतिइ धयातःगु दु, ‘महा– नगरीय सुशासन, नीति तथा योजना व्यवस्थापन, विकास निर्माण व सेवा प्रवाहयात थप सुदृढ यायेत स्थानीय सरकार सञ्चालन ऐन, २०७४ लिसें थीथी क्षेत्रलिसे सम्बन्धित संघीय कानूनत परिर्माजन व न्हू कानुन दयेकेगु लिसें महानगरपालिकाया नितिं संघीय संसदं बिस्कं ऐन जारी यायेत इनाप यानाच्वना ।’

उकथं हे मेयर सम्मेलनं उपमहानगरपालिका, नगरपालिका व गाउँपालिका लिसे सहकार्य यानाः हरित तथा समावेशी पूर्वाधार, सुशासन व विकास, वित्तिय लगानी, आयोजना तर्जुमा लिसे कार्यान्वयन व सेवा प्रवाहया क्षेत्रय् सहकार्य यायेगु घोषणा नं याःगु दु ।

मेयर सम्मेलनय् महानगरपालिकाया खुम्ह मेयर, उपमेयर व प्रमुख प्रशासकीय अधिकृततय्सं ब्वति काःगु खःसा यल महानगरपालिकाया मेयर चिरिबाबु महर्जन व भरतपुर महानगरपालिया मेयर रेणु दाहालं थःपिनिगु कार्यकालय् कार्य सम्पादनया झ्वलय् फयेमाःगु समस्यायात कयाः सहलह ब्याकादीगु खः । मेगु मेयर सम्मेलन भरतपुरय् जुइगु खँ धाःगु दु ।

सम्बन्धित बुखँ

LEAVE YOUR COMMENTS