नेपाल संवत् आन्दोलनया १४ बुँदे माग
येँ (नेपालभाषा टाइम्स)÷नेपाल संवत् ११४५ न्हूदँ क्यनीगु लसताय् म्हिगः न्हूदँ ११४५ समारोह समितिं येँय् छगू बृहत् कौला ज्याझ्वः यात । उपप्रधान–मन्त्री प्रकाशमान सिंह मूपाहां कथं झाःगु उगु ज्याझ्वः समारोह समितिया न्हूम्ह नायः राजेन्द्र श्रेष्ठया सभापतित्वय् जूगु खः । ज्याझ्वलय् नेपालभाषा आन्दोलनया न्ह्यलुवापिं हितकरवीर सिंह कंसकार, मल्ल के. सुन्दर, पवित्र वज्राचार्य लिसें आपालं कार्यकर्तात थ्यंगु खः।
उगु हे ज्याझ्वलय् न्हूदँ राष्ट्रिय गोष्ठीया १४ बुँदा दुगु घोषणा नं सार्वजनिक याःगु दु । नेवाः देय् दबू, नेपालभाषा मंकाः खलः, न्हूदँ राष्ट्रिय समारोह समिति ११४४, नेपालभाषा मंकाः खलः यल व विराट नेपालभाषा साहित्य गुथिया मंकाः ग्वसालय् वंगु नेसं. ११४४ बछलागा तृतीया कुन्हु नेपाल संवत् सम्बन्धी थ्व कार्यशाला जूगु खः ।
समारोह समितिया दुजः उमेश स्थापितं घोषणा सार्वजनिक यासें थुकियात लागू याकेगु नितिं दवाव बीत नं इनाप यानादिल । कार्यशाला गोष्ठीं तयार याःगु १४ बुँदाया घोषणा थुकथं दु–
१) दक्व सरकारी दस्तावेज व ज्याखँय् नेपाल संवत छ्यलेत दवाव बीगु ।
२) नेपाल संवत् राष्ट्रिय संवत् कथं सरकारी निकायय् छ्यलाबुला जुयाच्वंगु मजुयाच्वंगु देय्न्यंकंया सुचं मुंकाः छ्यलाबुला याःगु निकाययात सम्मान व मयाःपिन्त छ्यलेत दवाव बीगु ।
३) राज्यपाखें नेपाल संवत छ्यलाबुलाया वार्षिक प्रतिवेदन सार्वजनिक याकेगु ।
४) शंखधर साख्वाः व नेपाल संवतया बारे अध्ययन अनुसन्धानया नितिं राज्यपाखें अनुसन्धान प्रतिष्ठान गठन याकेगु ।
५) संयुक्त राष्ट्र संघय् नेपाल संवत न्हूदँया न्हियात ‘नेपाल डे’ कथं हनेगु परम्परा दुगु दिनाच्वंगुयात निरन्तरता बीकेगु ।
६) नेपाल संवत व शंखधर साख्वाःया नामं राष्ट्रिय सिरपाः व सम्मानया व्यवस्था याकेगु ।
७) राज्यपाखें नेपाल संवत हनेत बजेट व्यवस्था याकेगु । ८) वित्तीय कारोवार व बैंकय् नेपाल संवत छ्ययेके बीगु ।
९) नेपाःया मुद्राय् नेपाल संवत नं उल्लेख याकेगु ।
१०) विद्युतीय प्रविधि छ्यलाः नेपाल संवत छ्यले फइगु खँ योजनावद्ध प्रचार प्रसार यायेगु ।
११) नेवाःतय्सं थःपिनिगु संस्कारत हनेबलय् नेपाल संवत कथं हनेगु ।
१२) तिथिमिति कथं नखःचखः हनेबलय् छगू समुदायया परम्परायात मेगु समुदायं सम्मान यायेगु व समुदायया सांस्कृतिक पर्वयात बहसया विषय मदयेकुसे संयुक्त बैठक च्वनाः दच्छिया सुचं सार्वजनिक यायेगु ।
१३) ज्याझ्वःया ब्यानरय् अनिवार्य नेपाल संवत छ्यलेगु ।
१४) शंखधर साख्वाःया झ्वाता तयेगु अभियान न्ह्याकेगु ।
LEAVE YOUR COMMENTS