आः पार्टी तज्यायेफुगु ओलीया ख्याच्वः

येँ – प्रधानमन्त्री लिसें एमालेया अध्यक्ष केपी ओलीं आः वइगु निन्हुया दुने यदि माधव नेपाल पक्षं हस्ताक्षर लित मकाल धाःसा पार्टी एकता जुइ मफइगु खँ धयादीगु दु । म्हिगः बालुवाटारय् च्वंगु पार्टी केन्द्रीय कमिटीया बैठकय् न्ववासें वय्कलं कांग्रेसया सभापति शेरबहादुर देउवायात प्रधानमन्त्री दयेकेत स्वयाच्वंपिं एमाले सांसदपिंत छुट बी मफइगु खँ धयादीगु दु ।

यदि वय्कलं निन्हुया दुने हस्ताक्षर लित मकाल धाःसा पार्टी एकता जुइ मखु धासें अज्याःगु अवस्थाय् पार्टी तज्याःगु घोषणा याये मालीगु खँ धयादीगु खः ।

माधव नेपालयात थम्हं फोन यानाः नापलाये धयां नं नेता नेपाल माने मजू धासें धयादिल, ‘जिं नापलायेगु धकाः म्हीग सनिलय् नेता नेपालयात फोन याना, २०–२५ मिनेट खँ ल्हानाः नापलाये धयां वय्कः माने मजू, वय्कलं खँ ल्हायेगु झ्वलय् जितः लिसः बिल, जितः फोन हे ल्ह्वने मयःगु खः, पासापिनिगु दबाबं जक फोन ल्ह्वनागु खः धयादिल ।’

थ्वहे झ्वलय् पार्टीया वरिष्ठ उपाध्यक्ष वामदेव गौतमं निन्हुया दुने हस्ताक्षर लित कायेमाः धकाः बिउगु ख्याच्वः खारेज यायेत माग यानादीगु दु । नेता गौतमं म्हिगः ओली पक्षया केन्द्रीय कमिटीया बैठकय् ब्वति कयादीगु खः ।

थ्वहे झ्वलय् नेपाल पुचःया नेतातय्सं प्रधानमन्त्री ओलीयात बैठक दिकाः नेता नेपाललिसे वार्ता यायेत इनाप याःगु दु । ओली पक्षं सःतूगु बैठक न्ह्यः सुरेन्द्र पाण्डे, गोकर्ण विष्ट व भीम आचार्यपिसं बालुवाटारय् वनाः बैठक दिकेत इनाप यानादीगु खः । नेपाल पुचःया इनाप न्यनेधुंकाः प्रम ओलीं सल्लाह यायेगु लिसः बियादीगु खः ।