थ्व सरकारं संविधान संशोधन याइ ला ?

येँ – ‘संविधान संशोधन यायेमाः धइगु मुद्दा ज्वनाः चुनाव त्याकूम्ह संसफोया अध्यक्ष उपेन्द्र यादव सरकारय् वंगु दु । आः वय्कलं थ्व सरकारपाखें संविधान याकादी लाकि मदी, व झीसं स्वयेमाःगु दु ।’ नेवाः न्ह्यलुवा मल्ल के. सुन्दरं नेवाः अनलाइन न्युज स्वदँ फुनाः प्यदँय् क्यंगु लसताय् ‘नेवाः आन्दोलनया मुद्दा व थौंया लँपु’ विषयय् जूगु सभाय् न्ववासें थ्व खँ धयादीगु खः ।

उगु हे ज्याझ्वलय् न्ववासें संसफो सहअध्यक्ष लिसें सांसद राजेन्द्र श्रेष्ठं वर्तमान सरकारयाके ७० प्रतिशत स्वयां अप्वः बहुमत दु, उकिं थ्व सरकारपाखें संविधान संशोधन याकेगु लागिं दिलीप महर्जन थेंज्याःपिं नेवाः न्ह्यलुवापिंसं पहल यायेमाःगु बिचाः तयादिल ।

नेपाल कम्युनिष्ट पार्टीया केन्द्रीय दुजः दिलीप महर्जनं नेवाःत सकलें छप्पँ जुयाः आन्दोलन मयायेगु खःसा नेवाः राज्य प्राप्त याये फइ मखु धयादिल । नेपाली कांग्रेसया नेता तीर्थराम डंगोलं आन्दोलन जुइबलय् नेवाःत हाप्वः थें दना वयेमाःगु बिचाः तयादिल ।

नेवाः देय् दबूया नायः नरेश ताम्रकारं ३ नम्बर प्रदेशया नां नेवाः ताम्सालिङ तयेत थःपिं न्ह्यज्यानाच्वनागु खँ कनादिल । नेवाः अनलाइन न्युजया कजि लिसें नेवाः जागरण मञ्चया संयोजक सुजीव वज्राचार्यया सभापतित्वय् जूगु उगु ज्याझ्वः लिपा सांगीतिक ज्या नं जूगु खः।