गाउँपालिका अध्यक्ष ल्वायेत १० करोड खर्च !
येँ (नेपालभाषा टाइम्स)÷नेकपा माओवादी केन्द्रया अध्यक्ष पुष्पकमल दाहालं आःया निर्वाचन प्रणालीं देय्यात झ्वाकलय् थुनीगु खँ धयादीगु दु । नेपाल कम्युनिष्ट पार्टीया संस्थापक नेता नरबहादुर कर्माचार्यया गुक्वःगु लुमन्ति दिवसया झ्वलय् जूगु ज्याझ्वःयात सम्बोधन यासें वय्कलं उगु खँ धयादीगु खः ।
वय्कलं आःया इलय् आपाः ध्यबा खर्च मयासे चुनाव त्याके फइगु अवस्था मदु धासें क्रान्तिकारी व श्रमजीवी वर्गयात चुनाव त्याकेत तकं थाकुयाच्वंगु दु धयादिल । वय्कलंं धयादिल, ‘गां पालिकाया अध्यक्षय् चुनाव त्याकेगु नितिं नं १० करोड तका खर्च जूगु सुचं जितः वःगु दु, थज्याःगु अवस्था दत्तले देय्या अवस्था सुधार जुइ मखु । आःया शासन प्रणालीइ सांसद मजुइकं मन्त्री, प्रधानमन्त्री जुइ दइ मखु, अथे जुयाः करोडौं खर्च यानाः सांसद जुइत स्वइ, ध्यबा खर्च यानाः मन्त्री प्रधानमन्त्री जुइधुंकाः थम्हं यानागु लगानी म्हयेगु स्वइ, अले भ्रष्टाचार जुइ ।’
थ्व विषययात कयाः थःपिसं संविधानय् हे ‘नोट अफ डिसेन्ट’ च्वयागु खँ नं कनादिल । तर आःया स्थितिइ थ्वहे अवस्था च्वनाः जूसां थुकियात सुधारया नितिं थम्हं भूमिका म्हितेमाःगु खँ नं वय्कलं धयादिल ।
उकथं हे वय्कलं विचार व मुद्दा मिले जूपिं दथुइ सहकार्य जुइमाः, फुकसितं न्याय जुइ कथंया गठबन्धन जुइमाः धकाः थम्हं कुतः यानाच्वनागु खँ नं धयादीगु दु ।
अथे हे वय्कलं देय्या हिउपाः हयेत त्याग व बलिदान यानाः मू भूमिका म्हितूगु पार्टी माओवादी हे जूगु दावी यानादिल । माओवादीं हे नेतृत्व मयाःतले देशय् हिउपाः मवइगु दावी यासें वय्कलं धयादिल, ‘बुलेटय् मदु, ब्यालेटय् हे दु, थ्व संघर्ष नं वर्ग संघर्षया छगू रुप खः, देय्यात गुखेपाखे यंकेगु धइगु थुकिं क्वःछी ।’
उकथं हे अध्यक्ष दाहालं शान्ति प्रक्रियाय् वये स्वयां छुं ला न्ह्यः ‘चुनवाङ बैठक’ य् उगु इलय् हे देय्या राजनीतिक परिस्थितियात कयाः विश्लेषण यासें मेगु दल लिसे नं सहकार्य यानाः वनेफत धाःसा देय् गणतन्त्रय् वने फइ व उकिया नेतृत्व थःपिंसं यायेमाः धकाः किटान यानाः च्वयागु खँ धासें धयादिल, ‘थौंया राजनीति उकिया जःखः चाःहिलाच्वंगु दु । समाजवाद उन्मुख राज्यया परिकल्पना यानागु दु, तर मनूत संघीयता, गणतन्त्र विरुद्ध न्ववायेगु शुरु यायेधुंकूगु दु, संविधान विरुद्ध युद्ध यायेत स्वयाच्वंगु दु, परिस्थिति चुनवाङय् धइगु अवस्थाय् दु ।’
थ्वहे झ्वलय् न्ह्यःने वयाच्वंगु आम चुनावया लागिं माओवादी समेत जानाः समाजवादी केन्द्र गठनया तयारी जुयाच्वंगु खँ सीदुगु दु । छखे वाम पार्टीत फुक्क छथाय् च्वनाः केन्द्र दयेकेगु व चुनावय् वहे केन्द्र नेपाली कांग्रेसलिसे जानाः ल्वायेगु तयारी जुयाच्वंगु खँ धाःगु दु । अज्याःगु केन्द्रय् एमाले धाःसा मन्ह्यनीगु खने दयाच्वंगु दु ।
LEAVE YOUR COMMENTS