भाषाया मान्यता बीकेत एमालें प्रस्ताव यंकीगु
येँ (नेपालभाषा टाइम्स)- भाषा आयोगया सिफारिस कथं थीथी प्रदेशय् भाषायात मान्यता बीकेत एमालें संकल्प प्रस्ताव तइगु जूगु दु । संविधान कथं गठन जूगु भाषा आयोगं बागमती प्रदेशय् नेपालभाषा व तामाङ भाषायात सरकारी ज्याखँया भाषा कथं मान्यता बीत कानुन दयेकेगु खँय् वागमती प्रदेश सरकारं बेवास्ता यात धाःसा प्रमुख प्रतिपक्षी एमालें संकल्प प्रस्ताव तयेगु खँ पिहां वःगु खः ।
नेवाः देय् दबू येँ जिल्ला समितिया ग्वसालय् शनिवाः भाषा आयोगया सिफारिस बारे जूगु सहलह मुँज्याय् एमालेया वागमती प्रदेश सांसद राजेश शाक्यं थ्व खँ कनादीगु खः ।
ज्याझ्वलय् एमालेया मेम्ह सांसद नारायण सिलवालं वागमती प्रदेशय् ज्याखँया भाषा कथं भाषा आयोगया सिफारिसय् दुथ्याःगु नेपालभाषा व तामाङ भाय्यात मान्यता बीगु सवालय् एमाले दुने सहलह जुयाच्वंगु खँ कनादिल ।
अथे हे वागमती प्रदेशय् कांग्रेसया सांसदपिं नरोत्तम बैद्य व भिमसेन खत्रीं भाषा आयोगया सिफारिस कथं नेपाल– भाषा व तामाङ भाषायात कानुनी मान्यत बीकेत थःपिंसं माःगु भूमिका म्हितेगु बचं बियादिल ।
नेवाः देय् दबू येँ जिल्ला समितिया नायः धनबहादुर महर्जन तिमिलाया सभापतित्वय् जूगु उगु ज्याझ्वलय् नेवाः देय् दबू स्वनिगः विशेष प्रदेशया नायः श्रीकृष्ण महर्जनं भाषा आयोगं सिफारिस याःगुनिसें आः तक जुइधुंकूगु प्रक्रिया नापं आः यायेमाःगु ज्याखँयात सहलहया नितिं न्ह्यब्वयादीगु खः ।
ज्याझ्वलय् मूपाहां नेवाः देय् दबूया केन्द्रीय नायः पवित्र वज्राचार्यं आःया अवस्थाय् वागमती प्रदेशय् नेपालभाषा व तामाङ भाषायात सरकारी ज्याखँया भाषा कथं लागू याकेगु नितिं बागमती प्रदेशया सांसदतलिसे सहलह ब्याकाः वय्कःपिंसं बिउगु सुझाव कथं हे पलाः न्ह्याकेगु व प्रदेश सरकारयात निरन्तर दबाब बियाच्वनेगु खँ कनादिल ।
LEAVE YOUR COMMENTS