मेलम्चीया सुरुङय् येँय् वइगु लः छ्वया हल
येँ (नेपालभाषा टाइम्स)÷मेलम्ची खानेपानी परियोजनां म्हिगःनिसें सुरुङय् लः छ्वयेगु ज्या न्ह्याकूगु दु । वंगु न्याला न्ह्यवंनिसें दिनाच्वंगु सुरुङय् अस्थायी रुपं हाकनं सुरुङय् लः छ्वःगु खः । खुसिबालं क्षति यायेफइगु जुयाः वंगु असारं निसें सुरुङया खापा बन्द यानातःगु खःसा २६ किमि ताःहाकःगु सुरुङय् सिन्धुपाल्चोकया हेडवक्र्सं लः सुरुङय् छ्वया हःगु खः । आयोजनां वंगु महिनां निसें हे स्वनिगलय् लः हयेगु नितिं माःगु सुधार व तयारीया ज्या न्ह्याकूगु खः । आयोजनाया हेडवक्र्सया संरचना व सतक दयेकाः लः सुरुङय् छ्वःगु खः ।
सुरुङय् लः छ्वःसां नं स्वनिगलय् तक लः थ्यंकेत म्होतिं नं छवाः काइगु खँ धाःगु दु । आःयात म्हो जक लः सुरुङय् छ्वःगु खःसा छवाः लिपा १७ करोड ५० लिटर लः स्वनिगलय् छ्वयाहयेगु कथं तयारी जुयाच्वंगु जानकारी नं सामाजिक सञ्जालपाखें बिउगु दु ।
वंगु दँय् स्थायी संरचना खुसिबालं क्षतिग्रस्त जुइधुंकाः वा वइगु इलय् सुरुङय् लः हयेगु दिकाः चिकुलाय् मर्मत यानाः हाकनं लः छ्वयाहयेगु प्रक्रिया न्ह्याःगु खँ आयोजनां धाःगु दु । थगुने वर्षाया इलय् आयोजनाय् म्हो जक क्षति जूगुलिं थगुने सिबें न्हापां हे स्वनिगलय् लः हयेगु धाःसां नं लिपा जक स्वनिगलय् लः छ्वयाहयेत्यंगु खः ।
LEAVE YOUR COMMENTS