प्रधानमन्त्री फलाेअपया निंतिं अस्पतालय्, डिस्चार्जया इलय् छाय् आलाेचना ?
येँ – प्रधानमन्त्री केपी ओली थाै नियमित फलाेअपया निंतिं हाकनं महाराजगंजया टिचिंग अस्पताल झायादीगु दु । ओलीया निवाः न्ह्यव फागुन २१ गते थन सफल किडनी जलस्यँया प्रत्याराेपण जूगु खः । प्रधानमन्त्री ली थाैं १०ः३० बजे पाखे अस्पताल थ्यंकः झाःगु खः । वय्कःयात शुक्रवाः डिस्चार्ज याःगु खः ।
प्रधानमन्त्री केपीयात सफलतापूर्वक निक्वःगु जलस्यँ प्रत्यारोपण यानाः चर्चाय् वःपिं टिचिङ अस्पतालया डाक्टरत अन्तिमय् प्रम ओलीयात डिस्चार्ज याःगु शैलीया कारणं धाःसा आलोचित जूगु दु ।
संक्रमणया तच्वःगु सम्भावना दुम्ह प्रम ओली अस्पतालं मास्क छगू तकं मतसे डिस्चार्ज जुयादीगु खः । लिसें वय्कःयात अंगरक्षकतय्सं क्वातुक्क ज्वने मायेक न्यासिक हे हयाः गाडी गयेके बिउगु खः ।
प्रम डिस्चार्ज जूगु भिडियोलय् अंगरक्षकतय्सं ज्वनाः न्यासिके हःगु इलय् छथाय् स्वाहाने त्वाथः मखनाः वय्कः झन्दले दयेत्यंगु समेत खने दुगु खः । थ्व खनाः गुलिखे मनूतय्सं प्रमयात बांलाक स्वस्थ हे मजुइकं डिस्चार्ज यात धकाः नं चिकित्सकतय्गु आलोचना याःगु दु ।
तर टिचिङ अस्पताल सूत्रं धाःकथं प्रमयात चिकित्सकतय्सं अथे हे यानाः डिस्चार्ज याःगु धाःसा मखु । वय्कःयात क्वय् तक हयेगु लागिं ह्वील चियरतय् तयाः म्हुतुइ मास्क तयाः हे हःगु खः । तर कुहां ववं हे पिने मिडिया व मेपिं सर्वसाधारण मनूत मुनाच्वंगु दु धइगु सीवं प्रम थम्हं हे थःगु मास्क त्वःताः म्हिचाय् तयादीगु व लिपा मफु मफु थः हे दनाः न्यासि वःगु खँ धाःगु दु । वय्कः अथे दनादीवं वय्कःयात अंगरक्षकतय्सं क्वातुक ज्वंगु खः । पिने थ्यंकाः सर्वसाधारणयात ल्हाः संकाः प्रमं अभिवादन यानादीगु खः । प्रम उकथं पिहां वःगुलिं थःपिनि छुं दोष मदुगु खँ चिकित्सकतय्सं धयाच्वंगु दु ।
LEAVE YOUR COMMENTS