नागरिकताय् हानं राजनीति !
येँ (नेपालभाषा टाइम्स)÷पास जुइत ठिक्क जुइधुंकूगु नागरिकता विधेयक सरकारं लित काःगुलिं आः उकी हानं मेगु चलखेल जुइ फइगु आशंका याना हःगु दु । न्हापा एमालेया अध्यक्ष केपी ओली प्रधानमन्त्री जुयाच्वंगु इलय् सदनय् पेश यानातःगु नागरिकता विधेयक ताःहाकःगु विवादया वावजूद नं पास याये मफयाच्वंगु खः । तर विधेयकयात कयाः जुइमाःगु फुक्क सहलह क्वचायेकाः आः पारित जक याःसा गाःगु विधेयक लित काल धकाः एमालें म्हिगःनिसें हे विरोध शुरु याःगु दु ।
विधेयक लित कयाः सरकारं संसदीय प्रणालीयात हे हाथ्या बीगु ज्या यात धासें एमाले सांसद कृष्णभक्त पोखरेलं विधेयक लित कायेगु ज्या दिकेत माग यानादिल । आः सुम्क पारित याःसा गाःगु विधेयक लित कयाः हानं शून्यंनिसें ज्या यायेबलय् विधेयक पारित जुइगु हे खः लाकि मखु धइगु चिउताः ब्वलनीगु खँ नं वय्कलं कनादिल ।
केपी ओलीया पालय् हःगु थ्व विधेयकयात कयाः संसदीय समितिइ ३४ क्वः तक बैठक च्वनाः छगू तहलय् थ्यनेधुंकूगु जुयाः आः हानं शून्यंनिसें शुरु यायेबलय् न्हापा यानातःगु ज्या फुक्कं सितिकं वनीगु खँ नं वय्कलं कनादिल ।
अथे हे एमाले सांसद भीम रावलं नं वर्तमान सरकार कामचलाउ जक जूगु कारणं न्हापाया सरकारं हयातःगु विधेयक लित कायेगु अधिकार थ्वयात मदु धयादिल ।
अथे हे एमालेया मेम्ह सांसद शेरबहादुर तामांगं आः सरकारं लित काःगु थ्व विधेयकयात हानं सदनय् पेश यानाः उकी छलफल यानाच्वनेबलय् वर्तमान संसद हे भंग जुइधुंकीगु खँय् सचेत यानादिल । थुकिं यानाः थ्व विधेयकया ज्या आः चुनाव लिपा जक जू वनीगु खँ नं कनादिल ।
ओली सरकारं पेश यानातःगु नागरिकता विधेयक विदेशी नागरिकयात छु स्तरया गज्याःगु नागरिकता बीगु धइगु खँय् विवाद जुयाः पास जुइ मफयाच्वंगु खः ।
आः गज्याःगु विधेयक वइ ?
विवादय् लानाच्वंगु नागरिकता विधेयक म्हिगः गृहमन्त्री बालकृष्ण खाणं लित कयादीगु खः । विधेयक लित कायेगु लागिं वय्कलं सदनय् तयादीगु प्रस्ताव बहुमतं पारित जुइवं नागरिक विधेयक लिहां वंगु खः । वय्कलं आः सरकारपाखें तुरुन्त हे मेगु विधेयक दयेकाः सदनय् पेश याइगु जानकारी नं बियादिल ।
नागरिक विधेयकय् उल्लेखित गुलिखे बुँदाय् नेकपा (एमालें) कडा अडान कयाच्वंगु खःसा कांग्रेस, जसपा आदि पार्टी उदार जुयाच्वंगु खः । वर्तमान सरकारय् जसपाया प्रवेश नापनापं नागरिकता विधेयक नं लित काःगु जुयाः आः नागरिकताया सवालय् अझ विवादास्पद बुँदात दुथ्याकाः न्हूगु विधेयक तयार याइगु जुइ धकाः अनुमान यानाहःगु दु ।
LEAVE YOUR COMMENTS