सभामुखया रिटय् अन्तरिम आदेश मवल

येँ – संवैधानिक निकायय् नियुक्तियात कयाः सभामुख अग्नि सापकोटां सर्वोच्च अदालतय् तःगु मुद्दाय् अन्तिरिम आदेश जारी मजुल । म्हिगः जूगु प्रारम्भिक सुनुवाईया झ्वलय् न्यायाधीश प्रकाशकुमार ढुंगानां फुक्कं विपक्षीतय् नामय् कारण देखाउ आदेश धाःसा जारी याःगु दु ।

सभामुख सापकोटां राष्ट्रपतिया कार्यालय, संवैधानिक परिषद्या कार्यालय, प्रधानमन्त्री व मन्त्रिपरिषद कार्यालय, प्रधानमन्त्री केपी शर्मा ओली, राष्ट्रिय सभाया अध्यक्ष गणेश तिमिल्सिना, प्रधानन्यायाधीश चोलेन्द्र शम्शेर जबरा, संवैधानिक निकायय् नियुक्त जूपिं फुक्कं पदाधिकारीतय्त विपक्षी दयेकाः मुद्दा दायर यानादीगु खः ।

रिटय् सभामुख सापकोटां संवैधानिक निकायय् नियुक्त जूपिं पदाधिकारीतय्सं थःगु पदीय हैसियतं छुं नं निर्णय यायेमदइगु कथं अन्तरिम आदेशया माग नं यानादीगु खः। तर सर्वोच्च अदालतं अन्तरिम आदेश धाःसा जारी मयाः । न्यायाधीश ढुंगानाया इजलासं थ्व रिटयात अग्राधिकारी बीत धाःसा आदेश जूगु दु ।

संवैधानिक परिषद्ं सभामुख व प्रमुख विपक्षी नेताया उपस्थित हे मदयेक बैठक च्वनाः थीथी आयोगय् नियुक्ति यायेगु सिफारिस याःगु खःसा नियुक्त जूपिंसं संसदीय सुनुवाई हे मजुइकं छुं न्हि न्ह्यव शपथ ग्रहण यानाः पदभार लःल्हाना काःगु खः ।

सभामुख सापकोटां संवैधानिक परिषद्ं याःगु नियुक्ती हे अवैधानिक जूगु व संसद हे विघटन जूगु अवस्थाय् संसदीय समितिइ सुनुवाइ यायेफइमखु धकाः सिफारिस नां लितछ्वया बिउगु खःसां ४५ न्हुया दुने संसदीय समितिं सुनुवाईया निर्णय मबिल धाःसा स्वतः नियुक्त जुइ धयागु व्यवस्था कथं सिफारिस पदाधिकारीपिंसं शपथ ग्रहण यानाः पदभार लःल्हाना काःगु खः ।

सम्बन्धित बुखँ

LEAVE YOUR COMMENTS