स्कुलय् ब्वनाच्वंपिनिगु निंतिं मोबाइल एप

येँ – स्कुलय् आखः ब्वनीपिं चिचिधिकःपिं मस्तय्त अध्ययनय् ग्वाहालि यायेगु ल्याखं ‘स्मार्टर मोबाइल एप’ सार्वजनिक याःगु दु । म्याक्स कनेक्ट प्रा.लिं संचालनय् हःगु उगु मोबाइल एप छगू ज्याझ्वःया दथुइ नांजाःपिं हास्य कलाकारद्वय मदनकृष्ण श्रेष्ठ व हरिवंश आचार्यं सार्वजनिक यानादीगु खः ।

ज्याझ्वलय् नवासें मह जोडीं थःपिं स्कुलय् आखः ब्वनाच्वंगु इलय् अज्याःगु प्रविधि मदुगुलिं आखः ब्वनेत हे तसकं थाकूगु धासें थौंकन्हय् प्रविधिया कारणं विद्यार्थीतय्त आखः ब्वनेगुलिइ तसकं सहज जूवनाच्वंगु धारणा तयादिल । म्याक्स कनेक्टया प्रमुख कार्यकारी अधिकृत जीत रागबं प्यंगूनिसें गुंगू तगिंतकया विद्यार्थीयात लक्षित यानाः पाठ््यक्रमकथं हे उगु एप तयार यानागु जानकारी बियादिल ।

उगु एपपाखें अनलाइन व अफलानइ निगुलिं माध्यमं विद्यार्थीतय्सं अध्ययन याये फइ धासें वय्कलं छम्ह विद्यार्थीं न्याद्वः तका शुल्क पुलाः एपया सेवा काये फइगु नं जानकारी बियादिल । अथे हे देय्न्यंकंया डिलरपाखें दक्वं स्कुलतक उगु एपसयात थ्यंकेगु योजना दुगु नं वय्कलं धयादिल ।

संस्थाया निर्देशक राजेश तुलाधरं उगु एप युरोप, अस्ट्रेलिया, अमेरिकाय् थें नेपालय् नं स्कुलया विद्यार्थीतय्त अध्ययनय् ग्वाहालि जुइगु विश्वास प्वंकादिल । संस्थाया प्रबन्ध निर्देशक रीना वज्राचार्यं म्याक्स कनेक्ट टिमं थौया डिजिटल प्रविधिया युगयात ल्वयेक एप दयेकाः नेपाःया शिक्षा ख्यःयात सहज यायेगु कुतः यानाच्वनागु जानकारी बियादिल ।

उगु संस्थाया पुचलं थ्व स्वयां न्ह्यः ‘म्याक्स कनेक्ट इआरपी’ नांया मोबाइल एपपाखें नेपाः व भारतया प्यसः स्वयां अप्वः स्कुल व निगू लाख न्यय्न्हय्द्वलं मल्याक विद्यार्थीयात आवद्ध यानाः सेवा बिया वयाच्वंगु दु ।

सम्बन्धित बुखँ

LEAVE YOUR COMMENTS